aaKHiri kil

ek ḳhūbsūrat din

maiñ ne sochā

maiñ apne zer-e-intizām

baara sutūnoñ ko ārāsta karūñ

phir maiñ ne bahs kī

ek sarbarāh kī haisiyat se

merā faisla hogā

ki maiñ in sutūnoñ ko kaise ārāsta karūñ

masnūī phūloñ ke gul-daste lagā.ūñ

jāmid hayāt tasvīreñ

yā shā.eroñ ke ḳhāke

ta.alīmī board baiThā muskurātā rahā

aur sister 'īñā' bhī

aur 'sayyad-tāhir' bhī

aur 'mister-ashraf' bhī

aur phir sab ne ba-yak-āvāz kahā

aap jo chāheñ kareñ

maiñ ne calendar ke baara mahīnoñ se

baara urdu shā.eroñ ke ḳhāke nikāle

aur frame karā liye

mazdūroñ ne batāyā

ham ne har mumkin koshish kar lī

in mazbūt sutūnoñ meñ kīleñ nahīñ gaaḌī jā saktīñ

ta.alīmī board ne hathauḌā uThāyā

aur sister 'īñā' ne

aur 'sayyad-tāhir' ne

aur mister-ashraf ne

aur mez par bajā kar

ba-yak-āvāz kahā

ye aap ke tābūt meñ āḳhirī kiil thii!

ek KHubsurat din

main ne socha

main apne zer-e-intizam

bara sutunon ko aarasta karun

phir main ne bahs ki

ek sarbarah ki haisiyat se

mera faisla hoga

ki main in sutunon ko kaise aarasta karun

masnui phulon ke gul-daste lagaun

jamid hayat taswiren

ya shaeron ke KHake

talimi board baiTha muskuraata raha

aur sister 'ina' bhi

aur 'sayyad-tahir' bhi

aur 'mister-ashraf' bhi

aur phir sab ne ba-yak-awaz kaha

aap jo chahen karen

main ne calendar ke bara mahinon se

bara urdu shaeron ke KHake nikale

aur frame kara liye

mazduron ne bataya

hum ne har mumkin koshish kar li

in mazbut sutunon mein kilen nahin gaDi ja saktin

talimi board ne hathauDa uThaya

aur sister 'ina' ne

aur 'sayyad-tahir' ne

aur mister-ashraf ne

aur mez par baja kar

ba-yak-awaz kaha

ye aap ke tabut mein aaKHiri kil thi!