aaKHiri sawal

agar koī rut sitam-adā ho

havā ho barham fazā mukaddar

to us ko baḌh kar gale lagānā

ise badalnā use manānā maiñ jāntā huuñ

harīf koī anā-gazīda

jo mujh pe tīkhī nigāh Daale

to us ke tevar kī har kamāñ ko

agar chaḌhī ho

utaar duuñ tesha-e-nazar se

koī muhim de agar chunautī

mirī azīmat kā imtihāñ le

to merī ḳhud-etimādī-e-jāñ

use musaḳhḳhar banā ke chhoḌe

savāl ye hai

agar koī piir tasma-e-pā

safed bāloñ safed abrū

kī barchhiyāñ aur kamāñ uThā.e

ġhazab se apne mujhe Darā.e

to us se kyoñ kar panāh pā.ūñ

vo baḌh ke apnī kamand Daale

to kaise ye jism-o-jāñ chhuḌā.ūñ

koī to ho is sadī kā gautam

hakīm siinā ki ibn-e-mariyam

jo dasht-e-umr-e-ravāñ ke girdāb se nikāle

azāb-e-pīrī kī kāhishoñ se

bashar ko laḌne kā hausla de

agar koi rut sitam-ada ho

hawa ho barham faza mukaddar

to us ko baDh kar gale lagana

ise badalna use manana main jaanta hun

harif koi ana-gazida

jo mujh pe tikhi nigah Dale

to us ke tewar ki har kaman ko

agar chaDhi ho

utar dun tesha-e-nazar se

koi muhim de agar chunauti

meri azimat ka imtihan le

to meri KHud-etimadi-e-jaan

use musaKHKHar bana ke chhoDe

sawal ye hai

agar koi pir tasma-e-pa

safed baalon safed abru

ki barchhiyan aur kaman uThae

ghazab se apne mujhe Darae

to us se kyon kar panah paun

wo baDh ke apni kamand Dale

to kaise ye jism-o-jaan chhuDaun

koi to ho is sadi ka gautam

hakim sina ki ibn-e-mariyam

jo dasht-e-umr-e-rawan ke girdab se nikale

azab-e-piri ki kahishon se

bashar ko laDne ka hausla de