aakrosh

ye zālimoñ kā muāshra hai

yahāñ pe

zālim

agar saḌak par

kisī ko kuchleñ

to log tasvīr khīñchte haiñ

kahāñ vo muTThī ko bhīñchte haiñ

ye buz-diloñ kā muāshra hai

samāj sajde meñ

zālimoñ ke jhukā huā hai

na riiḌh baaqī

kisī ke tan meñ

na aab āñkhoñ meñ rah gayā hai

adālateñ

masḳharoñ kī chaupāl ban ga.ī haiñ

Tañgā hai

insāf sūliyoñ par

hai zulm

muskā.e kursiyoñ par

paḌā hai

mazlūm sīḌhiyoñ par

shikan

nahīñ hai kisī ke muñh par

ye dād-ḳhoroñ kī mañDlī hai

adab nahīñ hai

ye dād-ḳhorī bhī

kyā balā hai

ki haq pe

sab kā hī

muñh silā hai

adiib ajgar haiñ jo adab meñ

sadā-e-haq ko nigal rahe haiñ

usuul sab ne kuchal diye haiñ

qalam to kauḌī meñ bik ga.e haiñ

zahr bujhī hai

sahāfiyoñ kī zabāñ yahāñ par

lahū lagā hai ġharīb logoñ kā un ke muñh par

jidhar hukūmat kā ho ishāra

to dum hilāte haiñ ye vahāñ par

koī bhī haq pe nahīñ yahāñ par

kisī ko parvā

nahīñ kisānoñ kī

un kī jānoñ kī

koī phāñsī pe chāhe jhūle

yā zahr pī le

kise paḌī hai

ki peT jin ke bhare hue haiñ

vo bistaraoñ par paḌe hue haiñ

ugā rahe haiñ jo ḳhuun

de kar ġhizā zamīñ se

vahī zamīñ meñ gaḌe hue haiñ

yahāñ muñDeroñ pe

gidh baiThe haiñ vāsnā ke

nazar gaḌā ke

yahāñ pe ismat

nahīñ salāmat hai ab kisī kī

na bachchiyoñ kī na būḌhiyoñ kī

ye bheḌiyoñ kā muāshra hai

to mere mazlūm uTh khaḌā ho

tū apne zaḳhmoñ meñ

dhuul bhar le

ye sach hai is ko

qubūl kar le

tū aise barbar

samāj meñ sar

jhukā ke mat jī

tū ghūñT apmān ke nahīñ pī

agar hai yalġhār is kā hal to

mahāz par aa

ragoñ se Dar ab nikāl de tū

lahū havā meñ uchhāl de tū

ye zalimon ka muashra hai

yahan pe

zalim

agar saDak par

kisi ko kuchlen

to log taswir khinchte hain

kahan wo muTThi ko bhinchte hain

ye buz-dilon ka muashra hai

samaj sajde mein

zalimon ke jhuka hua hai

na riDh baqi

kisi ke tan mein

na aab aankhon mein rah gaya hai

adalaten

masKHaron ki chaupal ban gai hain

Tanga hai

insaf suliyon par

hai zulm

muskae kursiyon par

paDa hai

mazlum siDhiyon par

shikan

nahin hai kisi ke munh par

ye dad-KHoron ki manDli hai

adab nahin hai

ye dad-KHori bhi

kya bala hai

ki haq pe

sab ka hi

munh sila hai

adib ajgar hain jo adab mein

sada-e-haq ko nigal rahe hain

usul sab ne kuchal diye hain

qalam to kauDi mein bik gae hain

zahr bujhi hai

sahafiyon ki zaban yahan par

lahu laga hai gharib logon ka un ke munh par

jidhar hukumat ka ho ishaara

to dum hilate hain ye wahan par

koi bhi haq pe nahin yahan par

kisi ko parwa

nahin kisanon ki

un ki jaanon ki

koi phansi pe chahe jhule

ya zahr pi le

kise paDi hai

ki peT jin ke bhare hue hain

wo bistaraon par paDe hue hain

uga rahe hain jo KHun

de kar ghiza zamin se

wahi zamin mein gaDe hue hain

yahan munDeron pe

gidh baiThe hain wasna ke

nazar gaDa ke

yahan pe ismat

nahin salamat hai ab kisi ki

na bachchiyon ki na buDhiyon ki

ye bheDiyon ka muashra hai

to mere mazlum uTh khaDa ho

tu apne zaKHmon mein

dhul bhar le

ye sach hai is ko

qubul kar le

tu aise barbar

samaj mein sar

jhuka ke mat ji

tu ghunT apman ke nahin pi

agar hai yalghaar is ka hal to

mahaz par aa

ragon se Dar ab nikal de tu

lahu hawa mein uchhaal de tu