aao hum raqs karen

aao ham raqs-kunāñ shahr-e-tilismāt meñ jazbāt ke rañgoñ

se zamāne kī nigāheñ bhar deñ

aao ham raqs kareñ

ham vo kirdār haiñ jo

ka.ī sadiyoñ kā safar kaaT ke aa.e haiñ yahāñ

sabz jhīloñ pe ayaañ aks hamāre hī to haiñ

aao ḳhvāboñ ko kisī lai meñ pirote haiñ ġhazal kahte haiñ

jis meñ hoñ dard sabhī

ham haiñ gum-gashta sadāoñ ke ḳhazīne jo kabhī

in fazāoñ meñ hue dafn jahāñ

devtāoñ ne ka.ī hijr ke tūfāñ phūñke

ham ne gumnām zamānoñ kī haiñ fasleñ oḌhīñ

ham ne kohsāroñ pe naġhmāt bikhere haiñ ka.ī

ham parindoñ kī zabāñ jānte the

ham mohabbat kī azaañ dete the

ham ne tāroñ ko ziyā-bār kiyā

kyā tumheñ yaad hai ham ne bhī kabhī vasl piyā

vaqt ne pyaas utārī ham par

dasht-dar-dasht sulagtī huī aahoñ ko mujassam kar ke

ham ne hamvār kiye the raste

ham bhī taqsīm hue lahjoñ meñ

dāstānoñ meñ sarakte hoī lafzoñ meñ hamārī rūheñ

gūñjte gūñjte anjām talak aa pahuñcheñ

haath se haath milāo ab to

saañs se saañs jalāo ab to

kyuuñ gurezāñ ho qarīb aane se

aao ab raqs-kunāñ ishq kī takmīl kareñ

aao hum raqs-kunan shahr-e-tilismat mein jazbaat ke rangon

se zamane ki nigahen bhar den

aao hum raqs karen

hum wo kirdar hain jo

kai sadiyon ka safar kaT ke aae hain yahan

sabz jhilon pe ayan aks hamare hi to hain

aao KHwabon ko kisi lai mein pirote hain ghazal kahte hain

jis mein hon dard sabhi

hum hain gum-gashta sadaon ke KHazine jo kabhi

in fazaon mein hue dafn jahan

dewtaon ne kai hijr ke tufan phunke

hum ne gumnam zamanon ki hain faslen oDhin

hum ne kohsaron pe naghmat bikhere hain kai

hum parindon ki zaban jaante the

hum mohabbat ki azan dete the

hum ne taron ko ziya-bar kiya

kya tumhein yaad hai hum ne bhi kabhi wasl piya

waqt ne pyas utari hum par

dasht-dar-dasht sulagti hui aahon ko mujassam kar ke

hum ne hamwar kiye the raste

hum bhi taqsim hue lahjon mein

dastanon mein sarakte hoi lafzon mein hamari ruhen

gunjte gunjte anjam talak aa pahunchen

hath se hath milao ab to

sans se sans jalao ab to

kyun gurezan ho qarib aane se

aao ab raqs-kunan ishq ki takmil karen