aap-biti

man kī baat kahī na jaa.e

man kī baat kahī na jaa.e

man kā bhed kahūñ kyā un se

lab tak aakar rah jaatā hai

un se jo shikva hai mujh ko

ashkoñ meñ hī bah jaatā hai

kaun hai mujh ko jo samjhā.e

man kī baat kahī na jaa.e

kyūñkar bolūñ un se sajnī

kaisī guzrīñ merī rāteñ

kitnā phīkā sāvan biitā

kitnī suunī thiiñ barsāteñ

nainan dukh ke niir bahā.e

man kī baat kahī na jaa.e

ik pal chain na pā.ūñ un bin

yaad aate haiñ jāgte sote

din biite hai aaheñ bharte

raat kaTe hai rote rote

jiine se ab jī ghabrā.e

man kī baat kahī na jaa.e

yaad nahīñ rahtī haiñ bāteñ

prem meñ hosh bhī kho detī huuñ

kahtī huuñ kah dūñgī sab kuchh

jab aate haiñ ro detī huuñ

dil kī dil hī meñ rah jaa.e

man kī baat kahī na jaa.e

man ki baat kahi na jae

man ki baat kahi na jae

man ka bhed kahun kya un se

lab tak aakar rah jata hai

un se jo shikwa hai mujh ko

ashkon mein hi bah jata hai

kaun hai mujh ko jo samjhae

man ki baat kahi na jae

kyunkar bolun un se sajni

kaisi guzrin meri raaten

kitna phika sawan bita

kitni suni thin barsaten

nainan dukh ke nir bahae

man ki baat kahi na jae

ek pal chain na paun un bin

yaad aate hain jagte sote

din bite hai aahen bharte

raat kaTe hai rote rote

jine se ab ji ghabrae

man ki baat kahi na jae

yaad nahin rahti hain baaten

prem mein hosh bhi kho deti hun

kahti hun kah dungi sab kuchh

jab aate hain ro deti hun

dil ki dil hi mein rah jae

man ki baat kahi na jae