aaraf

tum is zamīñ ko zamīñ hī rahne do

sab shayātīn ko farishtoñ ko ḳhatm kar do

zamīñ jahannum kā aur jannat kā maz.har-e-ishtirāk hai

ye ki ik hasīñ imtizāj hai jis meñ pyār-o-ulfat ke

mīThe chashme bhī nafratoñ ke ubalte ātish-fishāñ bhī

gul bhī haiñ ḳhaar bhī gulistāñ bhī haiñ regzār bhī haiñ

bulandiyāñ bhī haiñ pastiyāñ bhī haiñ

dhuup chhāñv kā raat din kā tazād bhī hai

yahāñ ki haiñ dil-ḳharāsh chīḳheñ bhī ronā-dhonā bhī

aur ḳhushiyoñ ke chand naġhme bhī

saarī dhartī ke log aise hī

rukte chalte haiñ rote hañste haiñ

āsmāñ kī karāmatoñ ko bhī

apne hone ke almiye ko bhī jhelte haiñ

zamīn ik marhala-e-taḳhlīq-e-kā.enātī gunāh-e-lāzim

yā shahr-e-azdād ho bhī saktī hai kaun jaane

magar ye sach hai ki dilkashī aur husn

dhartī kī fitrī hai.at meñ hī milegā

ye āsmānī kitābeñ chhoḌo

zamīn jannat na ban sakegī

zamīñ jahannum na ban sakegī

zamīñ kī ā'rāfī haisiyat meñ hī us kī azmat bhī muḳhtafī hai

tum is zamīñ ko zamīñ hī rahne do

tum is zamin ko zamin hi rahne do

sab shayatin ko farishton ko KHatm kar do

zamin jahannum ka aur jannat ka mazhar-e-ishtirak hai

ye ki ek hasin imtizaj hai jis mein pyar-o-ulfat ke

miThe chashme bhi nafraton ke ubalte aatish-fishan bhi

gul bhi hain KHar bhi gulistan bhi hain regzar bhi hain

bulandiyan bhi hain pastiyan bhi hain

dhup chhanw ka raat din ka tazad bhi hai

yahan ki hain dil-KHarash chiKHen bhi rona-dhona bhi

aur KHushiyon ke chand naghme bhi

sari dharti ke log aise hi

rukte chalte hain rote hanste hain

aasman ki karamaton ko bhi

apne hone ke almiye ko bhi jhelte hain

zamin ek marhala-e-taKHliq-e-kaenati gunah-e-lazim

ya shahr-e-azdad ho bhi sakti hai kaun jaane

magar ye sach hai ki dilkashi aur husn

dharti ki fitri haiat mein hi milega

ye aasmani kitaben chhoDo

zamin jannat na ban sakegi

zamin jahannum na ban sakegi

zamin ki aa'rafi haisiyat mein hi us ki azmat bhi muKHtafi hai

tum is zamin ko zamin hi rahne do