aarzu bahaaron ki

ai āḳhir-e-shab ke māh-pāro

mujhe bhī tum apne saath le lo

ki dasht-e-tanhā.ī meñ ġhamoñ kī

fasīl par maiñ khaḌā huuñ tanhā

khaḌā huuñ aur tak rahā huuñ un

be-karāñ añdheroñ meñ jaane kab se

ki āḳhir-e-shab koī musāfir

bhaTak ke rāh-e-tarab se aa.e

kuchh us galī kā pata batā.e

ki jis meñ TuuTe haiñ merī chashm-e-umīd

se ārzūoñ ke taare

jinheñ añdheroñ ne Das liyā thā

jo raushnī ke payāmbar the

batā.e mujh ko ki ab vo chashm-e-tarab

kahāñ hai kis haal meñ hai

ki jis kī ḳhātir jalā.e haiñ

hasratoñ ke kitne charāġh ham ne

magar vo zulm-o-sitam kī āñdhī

jo dast-e-insāñ se chhīn letī hai

chand roza hayāt ke din

aur is ke badle meñ baḳhsh detī hai

bhūk-o-iflās o pyaas ke din

vo bhuuk aur pyaas jis ke sho.aloñ meñ

an-ginat jism phuñk rahe haiñ

ye nange bhūke bilakte bachche

ki jin kī āñkhoñ se ris rahā hai

urūj-e-insāniyat kā paanī

sunahre sikkoñ ke Dher

jin par

vo lothaḌe gosht ke jo baiThe haiñ

ban ke ajgar

unheñ uThāo

uThā ke khetoñ meñ dafn kar do

ki un kī ik musht ḳhaak

insāniyat kī khetī meñ kaam aa.e

ki zindagī un kī ek nāsūr hai

zamāne ke jism-o-jāñ par

sunahre sikkoñ ke Dher

ban jaa.eñ bāliyāñ

jau kī gehūñ kī chāvaloñ kī

ye bāliyāñ

phir kisī ke kānoñ meñ jhilmilā.eñ

ye chāñd ban kar

vatan ke māthe pe jagmagā.eñ

ai aaKHir-e-shab ke mah-paro

mujhe bhi tum apne sath le lo

ki dasht-e-tanhai mein ghamon ki

fasil par main khaDa hun tanha

khaDa hun aur tak raha hun un

be-karan andheron mein jaane kab se

ki aaKHir-e-shab koi musafir

bhaTak ke rah-e-tarab se aae

kuchh us gali ka pata batae

ki jis mein TuTe hain meri chashm-e-umid

se aarzuon ke tare

jinhen andheron ne Das liya tha

jo raushni ke payambar the

batae mujh ko ki ab wo chashm-e-tarab

kahan hai kis haal mein hai

ki jis ki KHatir jalae hain

hasraton ke kitne charagh hum ne

magar wo zulm-o-sitam ki aandhi

jo dast-e-insan se chhin leti hai

chand roza hayat ke din

aur is ke badle mein baKHsh deti hai

bhuk-o-iflas o pyas ke din

wo bhuk aur pyas jis ke shoalon mein

an-ginat jism phunk rahe hain

ye nange bhuke bilakte bachche

ki jin ki aankhon se ris raha hai

uruj-e-insaniyat ka pani

sunahre sikkon ke Dher

jin par

wo lothaDe gosht ke jo baiThe hain

ban ke ajgar

unhen uThao

uTha ke kheton mein dafn kar do

ki un ki ek musht KHak

insaniyat ki kheti mein kaam aae

ki zindagi un ki ek nasur hai

zamane ke jism-o-jaan par

sunahre sikkon ke Dher

ban jaen baaliyan

jau ki gehun ki chawalon ki

ye baaliyan

phir kisi ke kanon mein jhilmilaen

ye chand ban kar

watan ke mathe pe jagmagaen