aatish

dhartī ātish hai āsmāñ ātish

hai nihāñ aur kahīñ ayaañ ātish

ho charāġhāñ jale diye se diyā

kar na aise hī rā.egāñ ātish

dekh kar us kā ātishīñ chehra

ban ga.ī merī dāstāñ ātish

tab talak ham javān rahte haiñ

jab talak ham meñ hai javāñ ātish

be-dhuāñ be-sharāra be-lau bhī

phūñk detī hai be-zabāñ ātish

kitne hamdard haiñ nasheman ke

āñdhī barsāt bijliyāñ ātish

zehn meñ dil meñ ruuh meñ tan meñ

hai na jaane kahāñ kahāñ ātish

aag se aag ke bujhāne kā

falsafa kar rahī bayāñ ātish

jism ho ghar ho ban ho bastī ho

sab ko kartī hai be-nishāñ ātish

husn aur ishq meñ kashish hai tabhī

gar hai donoñ ke darmiyāñ ātish

ye kahīñ par hai chand lamhoñ kī

aur kahīñ par hai jāvedāñ ātish

zikr kyā kījiye jahannum kā

har qadam par hai jab yahāñ ātish

shuddh hai shuddh sab ko kartī hai

hai jahāñ meñ jahāñ-jahāñ ātish

dharti aatish hai aasman aatish

hai nihan aur kahin ayan aatish

ho charaghan jale diye se diya

kar na aise hi raegan aatish

dekh kar us ka aatishin chehra

ban gai meri dastan aatish

tab talak hum jawan rahte hain

jab talak hum mein hai jawan aatish

be-dhuan be-sharara be-lau bhi

phunk deti hai be-zaban aatish

kitne hamdard hain nasheman ke

aandhi barsat bijliyan aatish

zehn mein dil mein ruh mein tan mein

hai na jaane kahan kahan aatish

aag se aag ke bujhane ka

falsafa kar rahi bayan aatish

jism ho ghar ho ban ho basti ho

sab ko karti hai be-nishan aatish

husn aur ishq mein kashish hai tabhi

gar hai donon ke darmiyan aatish

ye kahin par hai chand lamhon ki

aur kahin par hai jawedan aatish

zikr kya kijiye jahannum ka

har qadam par hai jab yahan aatish

shuddh hai shuddh sab ko karti hai

hai jahan mein jahan-jahan aatish