aatish-e-diwar

bhūlne vaale aao phir se tajdīd-e-vafā karte haiñ

jahāñ se haath kī lakīreñ noch Daalī thiiñ

phir se un meñ rang bharte haiñ

jab Dhalne lage raat kā pahra

phir sub.h kā dam bharte haiñ

tujh ko vo pal yaad to hoñge

naġhme band āñkhoñ meñ tairte hoñge

yaad hai vo sab qahr kī ThanDī rāteñ

qaus-e-quzah ke rangoñ sī bāteñ

tasavvur-o-tasvīr banī hai taḳhlīq merī

kuchh tārīf kuchh tasdīq terī

merī bātoñ se kuchh mausam yaad aa jā.eñge

tujh ko sab mafhūm samajh aa jā.eñge

yaqīn hai mujh ko aise hī phir ik din aa milegā tū

merī tarah kuchh sulagtā sā kuchh bujhā-bujhā sā

bikhrā bikhrā udāsiyoñ meñ sisaktā sā

jhukī-jhukī āñkhoñ meñ aañsū kuchh pashemānī sī

chehre pe ḳhāmoshī Thahrī kuchh hairānī sī

zaḳhm kā ghaav jab bhar jā.egā

tab chain kahīñ aa jā.egā

tū bichhḌā thā ik zid meñ aa kar

ḳhud hī ab ātishī dīvār girā.egā

bhulne wale aao phir se tajdid-e-wafa karte hain

jahan se hath ki lakiren noch Dali thin

phir se un mein rang bharte hain

jab Dhalne lage raat ka pahra

phir subh ka dam bharte hain

tujh ko wo pal yaad to honge

naghme band aankhon mein tairte honge

yaad hai wo sab qahr ki ThanDi raaten

qaus-e-quzah ke rangon si baaten

tasawwur-o-taswir bani hai taKHliq meri

kuchh tarif kuchh tasdiq teri

meri baaton se kuchh mausam yaad aa jaenge

tujh ko sab mafhum samajh aa jaenge

yaqin hai mujh ko aise hi phir ek din aa milega tu

meri tarah kuchh sulagta sa kuchh bujha-bujha sa

bikhra bikhra udasiyon mein sisakta sa

jhuki-jhuki aankhon mein aansu kuchh pashemani si

chehre pe KHamoshi Thahri kuchh hairani si

zaKHm ka ghaw jab bhar jaega

tab chain kahin aa jaega

tu bichhDa tha ek zid mein aa kar

KHud hi ab aatishi diwar giraega