aawazen

aflāk ke tāroñ meñ jaltī bujhtī huī kuchh āvāzeñ haiñ

kohsār ke phūloñ meñ bikhrī bahkī huī kuchh āvāzeñ haiñ

hai mausam-e-gul kī aamad se ashkāl-e-chaman meñ tabdīlī

yā murġh-e-sahar kī gulshan meñ badlī huī kuchh āvāzeñ haiñ

zardār kī har āvāz meñ hai biphrī huī sūrat kā naqsha

mazdūr nahīf-o-bechāre sahmī huī kuchh āvāzeñ haiñ

āvāz jise ham kahte haiñ tahrīk hai ye kuchh shakloñ kī

ham jin ko samajhte haiñ shakleñ Thahrī huī kuchh āvāzeñ haiñ

vo giit hameñ jo yaad rahe dekhī huī sūrat hai koī

mānūs haiñ jo shakleñ ham se jaanī huī kuchh āvāzeñ haiñ

ilhād ke kuchh mai-ḳhvāroñ ne pī lī hai ziyāda hī shāyad

atrāf-e-dayār-e-maġhrib se bahkī huī kuchh āvāzeñ haiñ

ai 'zeb' khavayyā hī apne haiñ un kī luġhat se nā-vāqif

har bahr se maujoñ kī sūrat uThtī huī kuchh āvāzeñ

aflak ke taron mein jalti bujhti hui kuchh aawazen hain

kohsar ke phulon mein bikhri bahki hui kuchh aawazen hain

hai mausam-e-gul ki aamad se ashkal-e-chaman mein tabdili

ya murgh-e-sahar ki gulshan mein badli hui kuchh aawazen hain

zardar ki har aawaz mein hai biphri hui surat ka naqsha

mazdur nahif-o-bechaare sahmi hui kuchh aawazen hain

aawaz jise hum kahte hain tahrik hai ye kuchh shaklon ki

hum jin ko samajhte hain shaklen Thahri hui kuchh aawazen hain

wo git hamein jo yaad rahe dekhi hui surat hai koi

manus hain jo shaklen hum se jaani hui kuchh aawazen hain

ilhad ke kuchh mai-KHwaron ne pi li hai ziyaada hi shayad

atraf-e-dayar-e-maghrib se bahki hui kuchh aawazen hain

ai 'zeb' khawayya hi apne hain un ki lughat se na-waqif

har bahr se maujon ki surat uThti hui kuchh aawazen