aazmaish

patangoñ kī na sham-e-anjuman kī āzmā.ish hai

diloñ kā imtihāñ hai jān-o-tan kī āzmā.ish hai

musībat aa chukī hai aa rahī hai aane vaalī hai

shakeb-e-rūh kī tāb-e-badan kī āzmā.ish hai

ajal kyā jaane farq ahl-e-haram aur dair vāloñ kā

bilā tafrīq shaiḳh-o-barhaman kī āzmā.ish hai

chhalakte haiñ jigar ke ḳhuun se āñkhoñ ke paimāne

sukūn-o-sabr ke jām-e-kuhan kī āzmā.ish hai

savāl ab ḳhār-o-ḳhas yā ġhuncha-o-gul kā nahīñ hamdam

chalī teġh-e-ḳhizāñ saare chaman kī āzmā.ish hai

gale ghuTte haiñ yā phir TūTtī haiñ phāñsiyāñ dekheñ

sar-o-dosh ik taraf dār-o-rasan kī āzmā.ish hai

abhī kuchh rah ga.e haiñ taar dāmān-e-mohabbat meñ

figār insāniyat ke pairahan kī āzmā.ish hai

tamām ahl-e-zamīñ kī hamdamī kā zikr abhī se kyoñ

abhī to jazba-e-hubb-e-vatan kī āzmā.ish hai

patangon ki na sham-e-anjuman ki aazmaish hai

dilon ka imtihan hai jaan-o-tan ki aazmaish hai

musibat aa chuki hai aa rahi hai aane wali hai

shakeb-e-ruh ki tab-e-badan ki aazmaish hai

ajal kya jaane farq ahl-e-haram aur dair walon ka

bila tafriq shaiKH-o-barhaman ki aazmaish hai

chhalakte hain jigar ke KHun se aankhon ke paimane

sukun-o-sabr ke jam-e-kuhan ki aazmaish hai

sawal ab KHar-o-KHas ya ghuncha-o-gul ka nahin hamdam

chali tegh-e-KHizan sare chaman ki aazmaish hai

gale ghuTte hain ya phir TuTti hain phansiyan dekhen

sar-o-dosh ek taraf dar-o-rasan ki aazmaish hai

abhi kuchh rah gae hain tar daman-e-mohabbat mein

figar insaniyat ke pairahan ki aazmaish hai

tamam ahl-e-zamin ki hamdami ka zikr abhi se kyon

abhi to jazba-e-hubb-e-watan ki aazmaish hai