ab ke bichhaDna alamnak hoga

jab ḳhud shar vahm ban jaa.e

to zindagī TūT-phūT jaatī hai

haqīqat ka zahar ham

kisī kī chāhat meñ piite haiñ

jab sachchā.ī lab par laate haiñ

to maar diye jaate haiñ

judā.ī ka ziina bahut tavīl hotā hai

pul-e-sirāt kī tarah

muqaddar ka kināra nahīñ hotā

taqdīr ka shikva

haare hue sipāhī key ma.azarat hai

ham nasīb kho dene ka gila nahīñ karte

chupke se zindagī gañvā dete haiñ

kisī aahaT ke baġhair

kisī ko batlā.e baġhair

apnī umr se baḌā ishq karte haiñ

sab kuchh kho kar tujh meñ kho jaate haiñ

dil par añgāroñ kā paivand lagā lete haiñ

hoñToñ par zanjīr laTkā lete haiñ

jab koī va.ada kar ke bhī na aa.e

to muskurā kar so jaanā chāhiye

niiñd ishq se behtar hai

aur ishq va.ade se

jab koī tanhā chhoḌ kar chalā jaa.e

to dil mahtāb ke āñgan meñ

use naqsh kar lenā chāhiye

judā.ī ke sukūt-e-gum-gashta meñ

tum ne mujhe kyoñ bhulā diyā

abhī to ka.ī fasāne baaqī the

yuuñ achānak mādūm ho jaanā

kisī ko dīvāna banā detā hai

itnā vaqt bhī nahīñ hotā

ki judā.ī kā farmān sunāyā jā sake

yā maḳhdūsh ko dahlīz-e-ranjīda meñ dafn kar denā

qabl-e-ruḳhsat shab-e-mad.hosh ke bistar se

chāñdnī kī silvaTeñ miTā denā

ki is shahar kī havā.eñ bahut dāġh-dār haiñ

ab ke bichhaḌnā alamnāk hogā

ka.ī guzre sānehoñ key tarah

aao tumheñ ek nauha sunā duuñ

jo ishq key hikāyat hai

jo dāstān banegī

un bevafā dahaktī galiyoñ meñ

jab KHud shar wahm ban jae

to zindagi TuT-phuT jati hai

haqiqat ka zahar hum

kisi ki chahat mein pite hain

jab sachchai lab par late hain

to mar diye jate hain

judai ka zina bahut tawil hota hai

pul-e-siraat ki tarah

muqaddar ka kinara nahin hota

taqdir ka shikwa

haare hue sipahi key mazarat hai

hum nasib kho dene ka gila nahin karte

chupke se zindagi ganwa dete hain

kisi aahaT ke baghair

kisi ko batlae baghair

apni umr se baDa ishq karte hain

sab kuchh kho kar tujh mein kho jate hain

dil par angaron ka paiwand laga lete hain

honTon par zanjir laTka lete hain

jab koi wada kar ke bhi na aae

to muskura kar so jaana chahiye

nind ishq se behtar hai

aur ishq wade se

jab koi tanha chhoD kar chala jae

to dil mahtab ke aangan mein

use naqsh kar lena chahiye

judai ke sukut-e-gum-gashta mein

tum ne mujhe kyon bhula diya

abhi to kai fasane baqi the

yun achanak madum ho jaana

kisi ko diwana bana deta hai

itna waqt bhi nahin hota

ki judai ka farman sunaya ja sake

ya maKHdush ko dahliz-e-ranjida mein dafn kar dena

qabl-e-ruKHsat shab-e-madhosh ke bistar se

chandni ki silwaTen miTa dena

ki is shahar ki hawaen bahut dagh-dar hain

ab ke bichhaDna alamnak hoga

kai guzre sanehon key tarah

aao tumhein ek nauha suna dun

jo ishq key hikayat hai

jo dastan banegi

un bewafa dahakti galiyon mein