abhi aaina muzmahil hai

abhī

kuchh ḳharāsheñ haiñ chehre pe mere

abhī vaqt ke

saḳht nāḳhun kī yādeñ

satātī haiñ mujh ko Darātī haiñ mujh ko

miyāñ

mom ḳhvāboñ kī mere pighaltī na kaise

mirī samt sūraj uchhālā gayā thā

maiñ sho.aloñ kī daldal meñ dhañsne lagā thā

mire dast-o-pā sab jhulasne lage the

bahut shor mujh meñ uThā thā

har ik shai samā.at se ḳhālī

mujhe ghūrtī thī

nazar meñ koī rāsta hī nahīñ thā

kisī se koī vāsta hī nahīñ thā

achānak kisī ne pukārā thā mujh ko

uTho sub.h hone lagī hai

sabā baaġh meñ rañg bone lagī hai

havā ke darīche mahakne lage haiñ

manāzir fazā ke chamakne lage haiñ

magar ye sadāqat hai 'amjad'

abhī kuchh ḳharāsheñ haiñ chehre pe mere

abhī aa.ina muzmahil hai

abhī aa.ina muzmahil hai

abhi

kuchh KHarashen hain chehre pe mere

abhi waqt ke

saKHt naKHun ki yaaden

satati hain mujh ko Daraati hain mujh ko

miyan

mom KHwabon ki mere pighalti na kaise

meri samt suraj uchhaala gaya tha

main shoalon ki daldal mein dhansne laga tha

mere dast-o-pa sab jhulasne lage the

bahut shor mujh mein uTha tha

har ek shai samaat se KHali

mujhe ghurti thi

nazar mein koi rasta hi nahin tha

kisi se koi wasta hi nahin tha

achanak kisi ne pukara tha mujh ko

uTho subh hone lagi hai

saba bagh mein rang bone lagi hai

hawa ke dariche mahakne lage hain

manazir faza ke chamakne lage hain

magar ye sadaqat hai 'amjad'

abhi kuchh KHarashen hain chehre pe mere

abhi aaina muzmahil hai

abhi aaina muzmahil hai