abhi inqalab kahan hua

jo badal bhī jaa.eñ siyāsateñ baneñ millatoñ se riyāsateñ

ye to zehn kī haiñ nafāsateñ abhī inqalāb kahāñ huā

huī be-vatan ka.ī millateñ sahī fard fard ne zillateñ

ye hukūmatoñ kī haiñ illateñ abhī inqalāb kahāñ huā

vahī muflisoñ kī rivāyateñ vahī mun.imoñ kī ināyateñ

vahī kār-e-ḳhair kī ġhāyateñ abhī inqilāb kahāñ huā

vahī ba’ad-e-marg kī rāhateñ vahī zindagī kī qabāhateñ

vahī nafrateñ vahī chāhateñ abhī inqalāb kahāñ huā

na badal sakeñ jo mashīyyateñ hoñ vahī hamārī tabī.ateñ

vahī ādateñ vahī niyyateñ abhī inqalāb kahāñ huā

vahī daulateñ vahī hurmateñ vahī mehnateñ vahī ġhurbateñ

kise inqalāb kī fursateñ abhī inqalāb kahāñ huā

vahī fikr-e-'zeb' kī hiddateñ vahī zauq-e-sher kī shiddateñ

vahī vaqt vaqt kī jiddateñ abhī inqalāb kahāñ huā

jo badal bhi jaen siyasaten banen millaton se riyasaten

ye to zehn ki hain nafasaten abhi inqalab kahan hua

hui be-watan kai millaten sahi fard fard ne zillaten

ye hukumaton ki hain illaten abhi inqalab kahan hua

wahi muflison ki riwayaten wahi munimon ki inayaten

wahi kar-e-KHair ki ghayaten abhi inqilab kahan hua

wahi ba’ad-e-marg ki rahaten wahi zindagi ki qabahaten

wahi nafraten wahi chahaten abhi inqalab kahan hua

na badal saken jo mashiyyaten hon wahi hamari tabiaten

wahi aadaten wahi niyyaten abhi inqalab kahan hua

wahi daulaten wahi hurmaten wahi mehnaten wahi ghurbaten

kise inqalab ki fursaten abhi inqalab kahan hua

wahi fikr-e-'zeb' ki hiddaten wahi zauq-e-sher ki shiddaten

wahi waqt waqt ki jiddaten abhi inqalab kahan hua