achchhe din

badleñ phir ruḳh apnā havā.eñ

rañj ke bādal phir chhaT jaa.eñ

ḳhushiyāñ apnā rañg jamā.eñ

aish se hoñ māmūr fazā.eñ

raas aa.eñ yārab ye duā.eñ

mulk ke phir achchhe din aa.eñ

phir gulzār baneñ vīrāne

phir hoñ vahī rañgīñ afsāne

phir aa jaa.eñ agle zamāne

phir hoñ vahī pur-kaif tarāne

phir hoñ vahī dilchasp sadā.eñ

mulk ke phir achchhe din aa.eñ

des kī hālat phir ho chañgī

aa.e vahī daur-e-yak-rañgī

ḳhatm hoñ bāteñ sab be-Dhañgī

utre gale se tauq-e-farañgī

gore sab hijrat kar jaa.eñ

mulk ke phir achchhe din aa.eñ

sikka apnā raaj bhī apnā

taḳht bhī apnā taaj bhī apnā

palace apnā loadge bhī apnā

kal bhī apnā aaj bhī apnā

ham phir apnā ThāTh jamā.eñ

mulk ke phir achchhe din aa.eñ

mil apne hoñ mall ho apnā

san apnā ho saal ho apnā

daulat aur iqbāl ho apnā

ākās aur pātāl ho apnā

sab kuchh phir apne ho jaa.eñ

mulk ke phir achchhe din aa.eñ

badlen phir ruKH apna hawaen

ranj ke baadal phir chhaT jaen

KHushiyan apna rang jamaen

aish se hon mamur fazaen

ras aaen yarab ye duaen

mulk ke phir achchhe din aaen

phir gulzar banen virane

phir hon wahi rangin afsane

phir aa jaen agle zamane

phir hon wahi pur-kaif tarane

phir hon wahi dilchasp sadaen

mulk ke phir achchhe din aaen

des ki haalat phir ho changi

aae wahi daur-e-yak-rangi

KHatm hon baaten sab be-Dhangi

utre gale se tauq-e-farangi

gore sab hijrat kar jaen

mulk ke phir achchhe din aaen

sikka apna raj bhi apna

taKHt bhi apna taj bhi apna

palace apna loadge bhi apna

kal bhi apna aaj bhi apna

hum phir apna ThaTh jamaen

mulk ke phir achchhe din aaen

mil apne hon mall ho apna

san apna ho sal ho apna

daulat aur iqbaal ho apna

aakas aur patal ho apna

sab kuchh phir apne ho jaen

mulk ke phir achchhe din aaen