adhura KHwab

shahr kaise ye ajnabī Thahrā

kaise pahchān kho ga.ī merī

ab koī jāntā nahīñ mujh ko

sochtā huuñ to kaañp jaatā huuñ

sahme sahme se haiñ dar-o-dīvār

khiḌkiyāñ dekh kar ta.ajjub se

guftugū kar rahī haiñ aapas meñ

kaun aayā hai milne barsoñ baad

kah rahī hai ye mujh se kyā añgnā.ī

pūchhtī hai kahāñ se aa.e ho

kuchh batāo to kis se milnā hai

sochtā huuñ kahūñ maiñ kyā us se

merī bātoñ ko kab ye mānegī

mere qissoñ ko jhuuT jānegī

jis se milnā thā vo nazar hī nahīñ

haa.e ab koī muntazir hī nahīñ

zehn ye sochne pe hai majbūr

vāqa.ī der ho ga.ī hai kyā

rāste meñ kahīñ rukā hī nahīñ

der kaise huī phir aane meñ

shahr kaise ye ajnabi Thahra

kaise pahchan kho gai meri

ab koi jaanta nahin mujh ko

sochta hun to kanp jata hun

sahme sahme se hain dar-o-diwar

khiDkiyan dekh kar tajjub se

guftugu kar rahi hain aapas mein

kaun aaya hai milne barson baad

kah rahi hai ye mujh se kya angnai

puchhti hai kahan se aae ho

kuchh batao to kis se milna hai

sochta hun kahun main kya us se

meri baaton ko kab ye manegi

mere qisson ko jhuT jaanegi

jis se milna tha wo nazar hi nahin

hae ab koi muntazir hi nahin

zehn ye sochne pe hai majbur

waqai der ho gai hai kya

raste mein kahin ruka hi nahin

der kaise hui phir aane mein