afimi ka qissa

ye qissa hai afīmī kā jo ik gaañv meñ rahtā thā

nasha karne kī aadat thī bahut hī bholā-bhālā thā

laḌakpan gaañv meñ guzrā javānī bhī vahīñ guzrī

siyāhat kī tamanna thī to us ne kar lī tayyārī

savere ek din ghar se ravāna ho gayā paidal

thā kachchā rāsta aur har taraf phailā huā jangal

safar maġhrib kī jānib thā vo chaltā hī rahā sīdhā

huī jab dopahar to ek bargad kā shajar dekhā

usī bargad ke saa.e meñ afīmī so gayā thak kar

maze se niiñd lī ThanDī havā meñ us ne ghanTa bhar

huā bedār to mashriq kī jānib raah lī apnī

ḳhabar us ko nahīñ thī samt us kī ho ga.ī ulTī

vo chaltā hī rahā apnī tarañg meñ aur koshish thī

pahuñch jā.ūñ kisī bastī meñ raat aane se pahle hī

ġhurūb hone lagā sūraj to apne gaañv meñ pahuñchā

magar samjhā afīmī ne maiñ agle gaañv meñ pahuñchā

jab us ne gaañv ko dekhā bahut yaksāniyat paa.ī

kahā ye gaañv lagtā hai mire dehāt kā bhaa.ī

dukāneñ aur galī kūche mujhe vaise hī lagte haiñ

vahī shakl-o-shabāhat ke yahāñ insān baste haiñ

maiñ jis bastī meñ rahtā huuñ usī kā saarā naqsha hai

mujhe puurā yaqīñ hai ye mire gaañv kā charba hai

hai merā ghar bhī aisā hī jo mere sāmne ghar hai

ye gaañv to mire dehāt kā juḌvāñ barādar hai

qadam ghar meñ rakhā to ek muhtarma nazar aa.ī

afīmī samjhā vo sūrat mirī begam kī jaisī hai

jo aurat is makāñ meñ hai mirī begam kī copy hai

huī jab baat aurat se to ye uqda khulā us par

yahī hai merā gaañv merī begam aur merā ghar

ta.ajjub thā afīmī ko safar meñ puurā din guzrā

maiñ chaltā hī rahā sīdhā to kaise is jagah pahuñchā

afīmī ne jab apnī aql ke ghoḌe ko dauḌāyā

samajh-dānī se fauran hal muamme kā nikal aaya

zamīñ kā puurā chakkar maiñ ne ik din meñ lagāyā hai

azīmushshān kartab mā-badaulat ne dikhāyā hai

zamīñ hai gol is da.ave ko sābit kar diyā maiñ ne

subūt apne safar se aaj hāsil kar liyā maiñ ne

ye qissa hai afimi ka jo ek ganw mein rahta tha

nasha karne ki aadat thi bahut hi bhola-bhaala tha

laDakpan ganw mein guzra jawani bhi wahin guzri

siyahat ki tamanna thi to us ne kar li tayyari

sawere ek din ghar se rawana ho gaya paidal

tha kachcha rasta aur har taraf phaila hua jangal

safar maghrib ki jaanib tha wo chalta hi raha sidha

hui jab dopahar to ek bargad ka shajar dekha

usi bargad ke sae mein afimi so gaya thak kar

maze se nind li ThanDi hawa mein us ne ghanTa bhar

hua bedar to mashriq ki jaanib rah li apni

KHabar us ko nahin thi samt us ki ho gai ulTi

wo chalta hi raha apni tarang mein aur koshish thi

pahunch jaun kisi basti mein raat aane se pahle hi

ghurub hone laga suraj to apne ganw mein pahuncha

magar samjha afimi ne main agle ganw mein pahuncha

jab us ne ganw ko dekha bahut yaksaniyat pai

kaha ye ganw lagta hai mere dehat ka bhai

dukanen aur gali kuche mujhe waise hi lagte hain

wahi shakl-o-shabahat ke yahan insan baste hain

main jis basti mein rahta hun usi ka sara naqsha hai

mujhe pura yaqin hai ye mere ganw ka charba hai

hai mera ghar bhi aisa hi jo mere samne ghar hai

ye ganw to mere dehat ka juDwan baradar hai

qadam ghar mein rakha to ek muhtarma nazar aai

afimi samjha wo surat meri begam ki jaisi hai

jo aurat is makan mein hai meri begam ki copy hai

hui jab baat aurat se to ye uqda khula us par

yahi hai mera ganw meri begam aur mera ghar

tajjub tha afimi ko safar mein pura din guzra

main chalta hi raha sidha to kaise is jagah pahuncha

afimi ne jab apni aql ke ghoDe ko dauDaya

samajh-dani se fauran hal muamme ka nikal aaya

zamin ka pura chakkar main ne ek din mein lagaya hai

azimushshan kartab ma-badaulat ne dikhaya hai

zamin hai gol is dawe ko sabit kar diya main ne

subut apne safar se aaj hasil kar liya main ne