agar mujhe zaban mile

agar mujhe zabāñ mile

to dil kī dāstāñ kahūñ

ḳhud apne chāragar se hāl-e-sa.ī-e-rā.egāñ kahūñ

kahūñ ki kyuuñ fasurdagī hai ḳhema-zan bahār meñ

dhanak ke rang kyuuñ nahīñ haiñ aks-e-shāḳh-sār meñ

vo abr ban ke tairtī haiñ kyuuñ falak ke niil meñ

ga.e dinoñ kī kashtiyāñ jo haiñ nazar kī jhiil meñ

alam-nasīb dostoñ ko kyā huā

vo sabz mausamoñ ke ḳhvāb kyā hue

vo surḳh titliyāñ kahāñ ga.iiñ

maiñ sab kahūñ

maiñ sach kahūñ

maiñ saarī dāstāñ kahūñ agar mujhe zabāñ mile

agar mujhe zabāñ mile

batā.ūñ saare dard jin ko pairahan milā na harf-o-saut kā

sunā.ūñ sab kahāniyāñ

vo shaam shaam rañgatoñ kī an-kahī kahāniyāñ

bayāñ karūñ vo qurbateñ jo dil hī dil meñ rah ga.iiñ

vo dhuup dhuup chāhateñ

jo lafz bhī na ban sakīñ

jo ashk ban ke bah ga.iiñ

agar mujhe zabāñ mile

agar mujhe zabāñ mile

to irtiqā kī sab hadoñ ko toḌ duuñ

masīh-o-krishn sarmad-o-husain ke tamām raaz khol duuñ

azal abad ko joḌ duuñ

kahūñ azal azal na thā

kahūñ abad abad nahīñ

ki us kī ibtidā na thī

ki is kī intihā nahīñ

ye roz-o-shab kā silsila to koī silsila nahīñ

ye parda-e-ḳhayāl hai

magar ye silsila bhī mere nutq-o-lab ke bas meñ ho

ye merī dastaras meñ ho

agar mujhe zabāñ mile

agar mujhe zaban mile

to dil ki dastan kahun

KHud apne chaaragar se haal-e-sai-e-raegan kahun

kahun ki kyun fasurdagi hai KHema-zan bahaar mein

dhanak ke rang kyun nahin hain aks-e-shaKH-sar mein

wo abr ban ke tairti hain kyun falak ke nil mein

gae dinon ki kashtiyan jo hain nazar ki jhil mein

alam-nasib doston ko kya hua

wo sabz mausamon ke KHwab kya hue

wo surKH titliyan kahan gain

main sab kahun

main sach kahun

main sari dastan kahun agar mujhe zaban mile

agar mujhe zaban mile

bataun sare dard jin ko pairahan mila na harf-o-saut ka

sunaun sab kahaniyan

wo sham sham rangaton ki an-kahi kahaniyan

bayan karun wo qurbaten jo dil hi dil mein rah gain

wo dhup dhup chahaten

jo lafz bhi na ban sakin

jo ashk ban ke bah gain

agar mujhe zaban mile

agar mujhe zaban mile

to irtiqa ki sab hadon ko toD dun

masih-o-krishn sarmad-o-husain ke tamam raaz khol dun

azal abad ko joD dun

kahun azal azal na tha

kahun abad abad nahin

ki us ki ibtida na thi

ki is ki intiha nahin

ye roz-o-shab ka silsila to koi silsila nahin

ye parda-e-KHayal hai

magar ye silsila bhi mere nutq-o-lab ke bas mein ho

ye meri dastaras mein ho

agar mujhe zaban mile