agar wo chahe to lauT aae

agar vo mausam-mizāj tum ko kahīñ mile to ye us se kahnā ki lauT aa.e

use payām-e-bahār de kar bas itnā kahnā ḳhizāñ kā mausam guzar chukā hai

use batānā vo bad-nasībī kā ek kāñTā kabhī jo talve meñ chubh gayā thā nikal chukā hai

ki vaqt karvaT badal chukā hai

malūl-o-bojhal udaas shāmeñ bhī ab tabassum se āshnā haiñ

vo muzmahil aur ḳhamosh rāteñ bhī ab takallum se āshnā haiñ

use batānā ki zindagī ik yaqīn hai ab gumāñ nahīñ hai

ki aaj sham.oñ kī raqs kartī huī lavoñ meñ sunahre ḳhvāboñ kī raushnī hai dhuāñ nahīñ hai

kabhī sadā.eñ bhī be-navā thiiñ aur ab ḳhamoshī bhī ik suḳhan hai

qabā pe din kī hai koī dhabba na shab kā dāman hī pur-shikan hai

use batānā

ki zard mausam guzar gayā hai

magar use tum ye mat batānā ki jis meñ hijrat likhī thī us ne

vo ek lamha

dil-o-nazar meñ Thahar gayā hai

agar wo mausam-mizaj tum ko kahin mile to ye us se kahna ki lauT aae

use payam-e-bahaar de kar bas itna kahna KHizan ka mausam guzar chuka hai

use batana wo bad-nasibi ka ek kanTa kabhi jo talwe mein chubh gaya tha nikal chuka hai

ki waqt karwaT badal chuka hai

malul-o-bojhal udas shamen bhi ab tabassum se aashna hain

wo muzmahil aur KHamosh raaten bhi ab takallum se aashna hain

use batana ki zindagi ek yaqin hai ab guman nahin hai

ki aaj shamon ki raqs karti hui lawon mein sunahre KHwabon ki raushni hai dhuan nahin hai

kabhi sadaen bhi be-nawa thin aur ab KHamoshi bhi ek suKHan hai

qaba pe din ki hai koi dhabba na shab ka daman hi pur-shikan hai

use batana

ki zard mausam guzar gaya hai

magar use tum ye mat batana ki jis mein hijrat likhi thi us ne

wo ek lamha

dil-o-nazar mein Thahar gaya hai