agli hijrat ka dukh

bastī par shab-ḳhūn paḌā thā

raat ko dariyā ḳhuub chaḌhā thā

jab maiñ niklā

ghar se tanhā

apne dukh kā bojh uThā.e

buġhcha bāñdhe

ik roTī

chaqmāq kā patthar

ik mashkīza

TuuTā ḳhanjar

nāzuk sarkañDoñ kī naav

lahroñ lahroñ mujh ko le kar

saat samundar paar ga.ī thī

bah niklā thā

vaqt kā dhārā

ek nayā ghar

saath hamārā

yādoñ kā pushtāra

jaane kitne mausam guzre

phir ik shab ko maiñ ne dekhā

ik dum-dār sitāra

sub.h huī to

guuñj rahā thā

sādhū kā iktārā

jādū-nagrī ujaḌ chukī thī

zard paḌā jaatā thā lāġhar

ujḌā bosīda sayyāra

suntā huuñ ab

paas hī jaise

kuuch kā bajtā hai naqqārā

uḌne ko tayyār hai shāyad

aluminium kā rocket

pītal kā tayyāra

maiñ apnī tanhā.ī le kar

buġhcha bāñdhe

ik roTī

chaqmāq kā patthar

ik mashkīza

TuuTā ḳhanjar

yādoñ kā pushtāra

aglī manzil duur kahīñ hai

kaale patthar kā favvāra

aglī hijrat

'ālam-e-bālā meñ aglā sayyāra

vaqt kināra

basti par shab-KHun paDa tha

raat ko dariya KHub chaDha tha

jab main nikla

ghar se tanha

apne dukh ka bojh uThae

bughcha bandhe

ek roTi

chaqmaq ka patthar

ek mashkiza

TuTa KHanjar

nazuk sarkanDon ki naw

lahron lahron mujh ko le kar

sat samundar par gai thi

bah nikla tha

waqt ka dhaara

ek naya ghar

sath hamara

yaadon ka pushtara

jaane kitne mausam guzre

phir ek shab ko main ne dekha

ek dum-dar sitara

subh hui to

gunj raha tha

sadhu ka iktara

jadu-nagri ujaD chuki thi

zard paDa jata tha laghar

ujDa bosida sayyara

sunta hun ab

pas hi jaise

kuch ka bajta hai naqqara

uDne ko tayyar hai shayad

aluminium ka rocket

pital ka tayyara

main apni tanhai le kar

bughcha bandhe

ek roTi

chaqmaq ka patthar

ek mashkiza

TuTa KHanjar

yaadon ka pushtara

agli manzil dur kahin hai

kale patthar ka fawwara

agli hijrat

'alam-e-baala mein agla sayyara

waqt kinara