ahamadabaad

aag kā zā.iqa har zabāñ par sulagtā huā zaḳhm thā

raat kā āhanī dar samundar kī jānib khulā

aag hī aag thī

qatra-e-āb pur-kār sā ḳhvāb thā

raat kā āhanī dar jahannum kī jānib khulā

rāstoñ ne kahā kyuuñ hujūm-e-farāvāñ kā anjām ibrat huā

kaun ibrat ke ehsās ko māntā

maut ko zindagī zindagī ko jahannum fasāna tamasḳhur kā hairat huā

ham-safar the vo ek dūsre ke liye

qurb un kā magar ātish-e-ḳhauf thā

mauj se mauj laḌtī huī

mauj se mauj naddī ke ālām meñ jaise Dhaltī huī

khiḌkiyāñ rahguzar par muqaddar kī mānind khultī raheñ

jo tamāshā.ī un ke añdheroñ se ubhrā vo jaltā gayā

vo to nanhā thā ma.asūm thā

us ko sūraj kā yā chāñd kā aks sab ne kahā

vo bhī jalne lagā vo bhī bahte lahū meñ pighalne lagā

vo to nanhā thā ma.asūm thā

vo masīhā thā vo āḳhirī nuur thā us kī taqdīr meñ

marg be-kār kyuuñ aaj likkhī ga.ī

aag ka zaiqa har zaban par sulagta hua zaKHm tha

raat ka aahani dar samundar ki jaanib khula

aag hi aag thi

qatra-e-ab pur-kar sa KHwab tha

raat ka aahani dar jahannum ki jaanib khula

raston ne kaha kyun hujum-e-farawan ka anjam ibrat hua

kaun ibrat ke ehsas ko manta

maut ko zindagi zindagi ko jahannum fasana tamasKHur ka hairat hua

ham-safar the wo ek dusre ke liye

qurb un ka magar aatish-e-KHauf tha

mauj se mauj laDti hui

mauj se mauj naddi ke aalam mein jaise Dhalti hui

khiDkiyan rahguzar par muqaddar ki manind khulti rahen

jo tamashai un ke andheron se ubhra wo jalta gaya

wo to nanha tha masum tha

us ko suraj ka ya chand ka aks sab ne kaha

wo bhi jalne laga wo bhi bahte lahu mein pighalne laga

wo to nanha tha masum tha

wo masiha tha wo aaKHiri nur tha us ki taqdir mein

marg be-kar kyun aaj likkhi gai