ahmad-faraaz marhum ki nazr

tarab-faroz nazāroñ se duur kosoñ duur

jahāñ na qahqaha koī na koī sargoshī

faqat sukūt kā ik silsila chahār taraf

fazā ke hoñToñ pe hai sabt mohr-e-ḳhāmoshī

zabān-sāz hai gung aur naġhmagī chup hai

fazā-e-shahr-e-ḳhamoshāñ meñ zindagī chup hai

azal se tā-ba-abad silsila yahī hogā

gulāb ḳhaak se ug kar milegā miTTī meñ

gulāb surḳh ho yā kāsnī yā ‘unnābī

marūr-e-vaqt se mil ke rahegā miTTī meñ

yahī hai ramz-e-mashiyyat yahī hayāt kā raaz

yahī fanā kī haqīqat yahī sabāt kā raaz

havā-e-tund ke hāthoñ se jabr kī miqrāz

charāġh-e-gor-e-ġharībāñ kī lau katartī hai

mirī nigāh usī malgaje ujāle meñ

pahuñch ke marqad-e-tāza pe jab Thahartī hai

savāl dil ne kiyā marqad-e-‘farāz’ ye hai

nigah ne dil se kahā marqad-e-'farāz' ye hai

vo mard-e-ḳhalvat-o-jalvat vo mard-e-lauh-o-qalam

vo mard-e-nek-'amal aah mard-e-nek-bayāñ

maiñ apne aap ko bahlā.ūñ laakh ye kah ke

fan-e-'farāz' hai zinda magar 'farāz' kahāñ

mirī mizha pe larazte hue jo taare haiñ

'farāz' aap ke marqad kī nazr saare haiñ

tarab-faroz nazaron se dur koson dur

jahan na qahqaha koi na koi sargoshi

faqat sukut ka ek silsila chahaar taraf

faza ke honTon pe hai sabt mohr-e-KHamoshi

zaban-saz hai gung aur naghmagi chup hai

faza-e-shahr-e-KHamoshan mein zindagi chup hai

azal se ta-ba-abad silsila yahi hoga

gulab KHak se ug kar milega miTTi mein

gulab surKH ho ya kasni ya ‘unnabi

marur-e-waqt se mil ke rahega miTTi mein

yahi hai ramz-e-mashiyyat yahi hayat ka raaz

yahi fana ki haqiqat yahi sabaat ka raaz

hawa-e-tund ke hathon se jabr ki miqraaz

charagh-e-gor-e-ghariban ki lau katarti hai

meri nigah usi malgaje ujale mein

pahunch ke marqad-e-taza pe jab Thaharti hai

sawal dil ne kiya marqad-e-‘faraaz’ ye hai

nigah ne dil se kaha marqad-e-'faraaz' ye hai

wo mard-e-KHalwat-o-jalwat wo mard-e-lauh-o-qalam

wo mard-e-nek-'amal aah mard-e-nek-bayan

main apne aap ko bahlaun lakh ye kah ke

fan-e-'faraaz' hai zinda magar 'faraaz' kahan

meri mizha pe larazte hue jo tare hain

'faraaz' aap ke marqad ki nazr sare hain