ai arz-e-watan

vābasta tire naam se shā.ir kā qalam hai

ai paak vatan tujh se mire fan kā bharam hai

tū jannat-e-afkār hai pindār-e-iram hai

tere liye hāzir hai shahīdoñ kā hunar bhī

tū ġhāziyoñ ke jauhar-e-yaktā kā asar bhī

haañ markaz-e-īsār hai iḳhlās kā ghar bhī

phir kis kī nazar terī javānī ko lagī hai

bharpūr bahāroñ kī nishānī ko lagī hai

ye aag to bahte hue paanī ko lagī hai

iqbāl kī āñkhoñ meñ sulagte hue aañsū

dukh qā.id-e-āzam ko mirā kaT gayā baazū

tauhīd ke farzand haiñ bikhre hue har sū

tahrīk-e-amal hai na kahīñ fikr-e-baqā hai

maazī kī rivāyāt se ab kaam hī kyā hai

bhaa.ī bhī har-ik baat meñ bhaa.ī se judā hai

uTTho ki adū shahr kī dīvār tak aaya

ik shor sā ab kūcha-o-bāzār tak aaya

saffāk irādoñ kā hunar daar tak aaya

jo is kī taraf haath uThe toḌ ke rakh do

jo tiir chale us kī anī moḌ ke rakh do

dushman kī agar aañkh uThe phoḌ ke rakh do

maanā ki javānī tirī kāñToñ meñ tulī hai

chuntā huuñ tirā dard ki ab aañkh khulī hai

ai arz-e-vatan tū mire ashkoñ se dhulī hai

maiñ terī mohabbat kā asar aam karūñgā

ye zinda-e-jāved hunar aam karūñgā

phir nūr-e-nazar rang-e-sahar aam karūñgā

wabasta tere nam se shair ka qalam hai

ai pak watan tujh se mere fan ka bharam hai

tu jannat-e-afkar hai pindar-e-iram hai

tere liye hazir hai shahidon ka hunar bhi

tu ghaziyon ke jauhar-e-yakta ka asar bhi

han markaz-e-isar hai iKHlas ka ghar bhi

phir kis ki nazar teri jawani ko lagi hai

bharpur bahaaron ki nishani ko lagi hai

ye aag to bahte hue pani ko lagi hai

iqbaal ki aankhon mein sulagte hue aansu

dukh qaid-e-azam ko mera kaT gaya bazu

tauhid ke farzand hain bikhre hue har su

tahrik-e-amal hai na kahin fikr-e-baqa hai

mazi ki riwayat se ab kaam hi kya hai

bhai bhi har-ik baat mein bhai se juda hai

uTTho ki adu shahr ki diwar tak aaya

ek shor sa ab kucha-o-bazar tak aaya

saffak iradon ka hunar dar tak aaya

jo is ki taraf hath uThe toD ke rakh do

jo tir chale us ki ani moD ke rakh do

dushman ki agar aankh uThe phoD ke rakh do

mana ki jawani teri kanTon mein tuli hai

chunta hun tera dard ki ab aankh khuli hai

ai arz-e-watan tu mere ashkon se dhuli hai

main teri mohabbat ka asar aam karunga

ye zinda-e-jawed hunar aam karunga

phir nur-e-nazar rang-e-sahar aam karunga