ai lahore

tire daraḳhtoñ kī Tahniyoñ par bahār utre

tirī guzargāheñ nek rāhoñ kī manzileñ hoñ

mirā zamāna na.e na.e mausamoñ kī ḳhushbū

tire shab-o-roz kī mahak ho

zamīn par jab bhī raat phaile

kiran jo zulmat ko raushnī de tirī kiran ho

parinde uḌte hue parinde

hazār samtoñ se tere bāġhoñ meñ chahchahā.eñ

vo raat jis kī sahar nahīñ hai

vo tere shahroñ se tere qasboñ se duur guzre

vo haath jo azmatoñ ke hijje miTā rahā hai

vo haath lauh-o-qalam ke shajre se TuuT jaa.e

kalas pe lafzoñ ke phuul barseñ

tirī fasīloñ ke burj duniyā meñ jagmagā.eñ

akele-pan kī sazā meñ din kāTte hazāroñ

tirī ziyārat-gahoñ kī baḳhshish se tāza-dam hoñ

tire muqaddar kī bādshāhat zamīñ pe nikhre

na.e zamāne kī ibtidā tere naam se ho

ḳhushī ke chehre pe vasl kā abr tair jaa.e

tamām duniyā meñ tazkire tere phail jaa.eñ

tere daraKHton ki Tahniyon par bahaar utre

teri guzargahen nek rahon ki manzilen hon

mera zamana nae nae mausamon ki KHushbu

tere shab-o-roz ki mahak ho

zamin par jab bhi raat phaile

kiran jo zulmat ko raushni de teri kiran ho

parinde uDte hue parinde

hazar samton se tere baghon mein chahchahaen

wo raat jis ki sahar nahin hai

wo tere shahron se tere qasbon se dur guzre

wo hath jo azmaton ke hijje miTa raha hai

wo hath lauh-o-qalam ke shajre se TuT jae

kalas pe lafzon ke phul barsen

teri fasilon ke burj duniya mein jagmagaen

akele-pan ki saza mein din kaTte hazaron

teri ziyarat-gahon ki baKHshish se taza-dam hon

tere muqaddar ki baadshahat zamin pe nikhre

nae zamane ki ibtida tere nam se ho

KHushi ke chehre pe wasl ka abr tair jae

tamam duniya mein tazkire tere phail jaen