ajib aadmi tha wo

ajiib aadmī thā vo

mohabbatoñ kā giit thā

baġhāvatoñ kā raag thā

kabhī vo sirf phuul thā

kabhī vo sirf aag thā

ajiib aadmī thā vo

vo muflisoñ se kahtā thā

ki din badal bhī sakte haiñ

vo jābiroñ se kahtā thā

tumhāre sar pe sone ke jo taaj haiñ

kabhī pighal bhī sakte haiñ

vo bandishoñ se kahtā thā

maiñ tum ko toḌ saktā huuñ

sahūlatoñ se kahtā thā

maiñ tum ko chhoḌ saktā huuñ

havāoñ se vo kahtā thā

maiñ tum ko moḌ saktā huuñ

vo ḳhvāb se ye kahtā thā

ki tujh ko sach karūñgā maiñ

vo ārzūoñ se kahtā thā

maiñ terā ham-safar huuñ

tere saath hī chalūñgā maiñ

tū chāhe jitnī duur bhī banā le apnī manzileñ

kabhī nahīñ thakūñgā maiñ

vo zindagī se kahtā thā

ki tujh ko maiñ sajā.ūñgā

tū mujh se chāñd maañg le

maiñ chāñd le ke ā.ūñgā

vo aadmī se kahtā thā

ki aadmī se pyaar kar

ujaḌ rahī hai ye zamīñ

kuchh is kā ab siñghār kar

ajiib aadmī thā vo

vo zindagī ke saare ġham

tamām dukh

har ik sitam se kahtā thā

maiñ tum se jiit jā.ūñgā

ki tum ko to miTā hī degā

ek roz aadmī

bhulā hī degā ye jahāñ

mirī alag hai dāstāñ

vo āñkheñ jin meñ ḳhvāb haiñ

vo dil hai jin meñ aarzū

vo baazū jin meñ hai sakat

vo hoñT jin pe lafz haiñ

rahūñgā un ke darmiyāñ

ki jab maiñ biit jā.ūñgā

ajiib aadmī thā vo

ajib aadmi tha wo

mohabbaton ka git tha

baghawaton ka rag tha

kabhi wo sirf phul tha

kabhi wo sirf aag tha

ajib aadmi tha wo

wo muflison se kahta tha

ki din badal bhi sakte hain

wo jabiron se kahta tha

tumhaare sar pe sone ke jo taj hain

kabhi pighal bhi sakte hain

wo bandishon se kahta tha

main tum ko toD sakta hun

sahulaton se kahta tha

main tum ko chhoD sakta hun

hawaon se wo kahta tha

main tum ko moD sakta hun

wo KHwab se ye kahta tha

ki tujh ko sach karunga main

wo aarzuon se kahta tha

main tera ham-safar hun

tere sath hi chalunga main

tu chahe jitni dur bhi bana le apni manzilen

kabhi nahin thakunga main

wo zindagi se kahta tha

ki tujh ko main sajaunga

tu mujh se chand mang le

main chand le ke aaunga

wo aadmi se kahta tha

ki aadmi se pyar kar

ujaD rahi hai ye zamin

kuchh is ka ab singhaar kar

ajib aadmi tha wo

wo zindagi ke sare gham

tamam dukh

har ek sitam se kahta tha

main tum se jit jaunga

ki tum ko to miTa hi dega

ek roz aadmi

bhula hi dega ye jahan

meri alag hai dastan

wo aankhen jin mein KHwab hain

wo dil hai jin mein aarzu

wo bazu jin mein hai sakat

wo honT jin pe lafz hain

rahunga un ke darmiyan

ki jab main bit jaunga

ajib aadmi tha wo