aks ki qaid

vo bhī kaisī laḌkī thī

pāniyoñ meñ bahtī thī

bādaloñ meñ rahtī thī

saañs saañs chaltī thī

baat baat rahtī thī

hoñT maiñ hilātā thā aur vo mahaktā sā

giit bantī jaatī thī

jo qalam hilātā to dil ke saaf kāġhaz par

nazm bantī jaatī thī

aañkh ke darīche meñ chāñd ban ke khultī thī

aur mere ḳhvāboñ kī vādiyoñ meñ rahtī thī

vo bhī kaisī laḌkī thī

apnī maut se pahle dūsre din aane kā

va.ada kar ga.ī thī vo

dūsrā baras lekin bītne ko aaya hai

phir bhī vo nahīñ aa.ī

kyā ajiib laḌkī thī

aaj vo fanā oḌhe ḳhaak ke gharauñde meñ

gahrī niiñd sotī hai

hañstī hai na rotī hai

bevafā nahīñ lekin bevafā sī lagtī hai

chand roz ruk jaatī

ashk ban ke āñkhoñ ke pāniyoñ meñ kyoñ bahtī

dhund ban ke ḳhvāboñ ke bādaloñ meñ kyoñ rahtī

wo bhi kaisi laDki thi

paniyon mein bahti thi

baadalon mein rahti thi

sans sans chalti thi

baat baat rahti thi

honT main hilata tha aur wo mahakta sa

git banti jati thi

jo qalam hilata to dil ke saf kaghaz par

nazm banti jati thi

aankh ke dariche mein chand ban ke khulti thi

aur mere KHwabon ki wadiyon mein rahti thi

wo bhi kaisi laDki thi

apni maut se pahle dusre din aane ka

wada kar gai thi wo

dusra baras lekin bitne ko aaya hai

phir bhi wo nahin aai

kya ajib laDki thi

aaj wo fana oDhe KHak ke gharaunde mein

gahri nind soti hai

hansti hai na roti hai

bewafa nahin lekin bewafa si lagti hai

chand roz ruk jati

ashk ban ke aankhon ke paniyon mein kyon bahti

dhund ban ke KHwabon ke baadalon mein kyon rahti