aks

merā kamra ba-zāhir saada sā hai

halkī zardī-mā.il dīvāreñ

safed chhat

jis pe jamī gard kī tah ne us kī safedī ko maañd kar rakhā hai

us meñ do logoñ kā bistar aur

us ke ain sāmne do logoñ ke baiThne vaalā maTiyāle se rang kā sofa paḌā hai

daa.eñ dīvār par khiḌkī hai

khiḌkī pe parda nahīñ

yūñhī āsmānī se rang kī chādar laTkā rakhī hai

duniyā to musāfir-ḳhāna hai nā

jaane kab raḳht-e-safar bāñdhnā paḌe

to kaun ārā.ish kartā phire is sarā.e kī

bistar kī baa.eñ jānib ek baḌā sā ā.īna hai

jo mere kamre kī sab se ajiib chiiz hai

us meñ ek aks hai jo hū-bahū mere jaisā hai

jo mere batā.e binā jāntā hai ki maiñ kyā karne vaalī huuñ

kyā bolne vaalī huuñ

maiñ ye nahīñ jāntī ki use mere man andar ke haal kī bhī ḳhabar hai

yā mahaz zāhir ko jāntā hai

sach kahūñ

mujhe to vo ḳhud apne aap se bhī anjān lagtā hai

jaane kyoñ vo merī naql karte kabhī thaktā hī nahīñ

muskurā ke dekhūñ to muskurātā hai

savāl karūñ to javāb nahīñ detā

balki ḳhud bhī savāl kartā hai

ghuur ke dekhūñ to vo bhī ghūrtā hai

mere māthe pe shikan ubhre

tafakkur yā ġhusse se

to us kā māthā bhī shikan-ālūd ho jaatā hai

ek din ġhusse meñ maiñ ne use gaalī dī to us ne bhī turant gaalī bak dī

hai nā gustāḳh bad-lihāz

kal hī merī dekhā dekhī vo bhī merī hī ik ġhazal gungunāne lagā

to bahut pyaar aaya mujhe us par

be-sāḳhta us kā māthā chūmnā chāhā to us ne mere laboñ pe lab rakh diye

meñ bad-maza sī ho kar pīchhe haTī

tab se musalsal dil meñ ek armān machal rahā hai

ki kaash maiñ apne aks kā māthā chuum sakūñ

mera kamra ba-zahir sada sa hai

halki zardi-mail diwaren

safed chhat

jis pe jami gard ki tah ne us ki safedi ko mand kar rakha hai

us mein do logon ka bistar aur

us ke ain samne do logon ke baiThne wala maTiyale se rang ka sofa paDa hai

daen diwar par khiDki hai

khiDki pe parda nahin

yunhi aasmani se rang ki chadar laTka rakhi hai

duniya to musafir-KHana hai na

jaane kab raKHt-e-safar bandhna paDe

to kaun aaraish karta phire is sarae ki

bistar ki baen jaanib ek baDa sa aaina hai

jo mere kamre ki sab se ajib chiz hai

us mein ek aks hai jo hu-bahu mere jaisa hai

jo mere batae bina jaanta hai ki main kya karne wali hun

kya bolne wali hun

main ye nahin jaanti ki use mere man andar ke haal ki bhi KHabar hai

ya mahaz zahir ko jaanta hai

sach kahun

mujhe to wo KHud apne aap se bhi anjaan lagta hai

jaane kyon wo meri naql karte kabhi thakta hi nahin

muskura ke dekhun to muskuraata hai

sawal karun to jawab nahin deta

balki KHud bhi sawal karta hai

ghur ke dekhun to wo bhi ghurta hai

mere mathe pe shikan ubhre

tafakkur ya ghusse se

to us ka matha bhi shikan-alud ho jata hai

ek din ghusse mein main ne use gali di to us ne bhi turant gali bak di

hai na gustaKH bad-lihaz

kal hi meri dekha dekhi wo bhi meri hi ek ghazal gungunane laga

to bahut pyar aaya mujhe us par

be-saKHta us ka matha chumna chaha to us ne mere labon pe lab rakh diye

mein bad-maza si ho kar pichhe haTi

tab se musalsal dil mein ek arman machal raha hai

ki kash main apne aks ka matha chum sakun