alag alag ikaiyan

sub.h se maiñ us ghaḌī kī Tik Tik sun rahā huuñ

jo dīvār se achānak ġhā.eb ho ga.ī hai

lekin har ghanTe ke iḳhtitām par

alarm dene lagtī hai

aur phir Tik Tik Tik

kabhī kabhī ye Tik Tik

mujhe apne siine meñ sunā.ī detī hai

kabhī kalā.ī kī nabz meñ

phir to jis chiiz ko uThā kar kaan se lagātā huuñ

vo Tik Tik karne aur alarm dene lagtī hai

achānak maiñ apne aqab kī dīvār ko dekhtā huuñ

vahāñ mujhe ye ghaḌī

dīvār par auñdhī chipkī dikhā.ī detī hai

sāmne kī dīvār se ye aqab kī dīvār par kaise aa ga.ī

aur us kī sūiyāñ aur Dial dīvār se chipak kaise ga.e

jaise us kā vaqt dīvār ke us paar ke liye ho

maiñ barābar ke kamre meñ jaatā huuñ

ab mujhe vaqt dikh rahā hai

lekin ghaḌī ġhā.eb hai

ab na us kī Tik Tik hai na alarm

maiñ ne chāhā ki chīzoñ ko chhū kar dekhūñ

Thiik us vaqt mujhe andāza huā

maiñ chīzoñ ko dekh saktā huuñ

chhū nahīñ saktā

is kamre meñ to maiñ ḳhud ulTī huī ghaḌī huuñ

ye kamra aur vo kamra

do alag alag ikā.iyāñ haiñ

unheñ ek nahīñ kiyā jā saktā

bas us kamre meñ thoḌī der ke liye jhāñkā jā saktā hai

maiñ vāpas apne kamre meñ aa jaatā huuñ

vahāñ

jahāñ maiñ har chiiz ko chhū saktā huuñ

aur har chiiz meñ

vaqt kī ye Tik Tik sun saktā huuñ

chāhe sāmne ghaḌī ho

yā na ho

subh se main us ghaDi ki Tik Tik sun raha hun

jo diwar se achanak ghaeb ho gai hai

lekin har ghanTe ke iKHtitam par

alarm dene lagti hai

aur phir Tik Tik Tik

kabhi kabhi ye Tik Tik

mujhe apne sine mein sunai deti hai

kabhi kalai ki nabz mein

phir to jis chiz ko uTha kar kan se lagata hun

wo Tik Tik karne aur alarm dene lagti hai

achanak main apne aqab ki diwar ko dekhta hun

wahan mujhe ye ghaDi

diwar par aundhi chipki dikhai deti hai

samne ki diwar se ye aqab ki diwar par kaise aa gai

aur us ki suiyan aur Dial diwar se chipak kaise gae

jaise us ka waqt diwar ke us par ke liye ho

main barabar ke kamre mein jata hun

ab mujhe waqt dikh raha hai

lekin ghaDi ghaeb hai

ab na us ki Tik Tik hai na alarm

main ne chaha ki chizon ko chhu kar dekhun

Thik us waqt mujhe andaza hua

main chizon ko dekh sakta hun

chhu nahin sakta

is kamre mein to main KHud ulTi hui ghaDi hun

ye kamra aur wo kamra

do alag alag ikaiyan hain

unhen ek nahin kiya ja sakta

bas us kamre mein thoDi der ke liye jhanka ja sakta hai

main wapas apne kamre mein aa jata hun

wahan

jahan main har chiz ko chhu sakta hun

aur har chiz mein

waqt ki ye Tik Tik sun sakta hun

chahe samne ghaDi ho

ya na ho