alwidai mulaqat ke baad

be-yaqīnī ke ziine pe chalte hue

us ne bāhar qadam jo nikālā

to cafe kī dīvār se dekhtī

monalisa ke chehre pe

sadiyoñ se phailā tabassum bhī

ik pal ko gahnā gayā

Tiinā saanī kī āvāz ke saa.e meñ

us ke hoñToñ kī jumbish

sarāboñ sī mahsūs hone lagī

us kī āñkhoñ pe chhā.ī huī dhund

chāroñ dishāoñ meñ uḌne lagī

be-yaqīnī kā ziina qadam-ba-qadam

us ke pairoñ ke hamrāh baḌhne lagā

aah khīñchī aur us ne

do-ālam kī saarī udāsī ko

apne badan meñ sameTā to sochā

ki kohra udāsī kā ham-zād hai

yak-ba-yak

zabt kī āmariyyat ke bāġhī

kisī ḳhvāb ne

us kī palkoñ ke zindāñ se

kuud kar ḳhud-kushī kī to

mafrūr aañsū qatāreñ banā kar nikalne lage

gol-chakkar pe raushan kisī qumqume ke

ujāle meñ geñde ke phūloñ ne

jab us ke gāloñ pe girtī huī

os dekhī to murjhā ga.e

surma.ī ghaas ne

saal kī āḳhirī shaam

meñ aaj pahlī dafa

us ko ḳhāmosh dekhā

to nam ho ga.ī

chāroñ jānib utartī huī dhund ne

ḳhud ko kuchh aur bojhal kiyā

us ko logoñ kī nazroñ se ojhal kiyā

aur vo laḌkī kahīñ kho ga.ī

be-yaqini ke zine pe chalte hue

us ne bahar qadam jo nikala

to cafe ki diwar se dekhti

monalisa ke chehre pe

sadiyon se phaila tabassum bhi

ek pal ko gahna gaya

Tina sani ki aawaz ke sae mein

us ke honTon ki jumbish

sarabon si mahsus hone lagi

us ki aankhon pe chhai hui dhund

chaaron dishaon mein uDne lagi

be-yaqini ka zina qadam-ba-qadam

us ke pairon ke hamrah baDhne laga

aah khinchi aur us ne

do-alam ki sari udasi ko

apne badan mein sameTa to socha

ki kohra udasi ka ham-zad hai

yak-ba-yak

zabt ki aamariyyat ke baghi

kisi KHwab ne

us ki palkon ke zindan se

kud kar KHud-kushi ki to

mafrur aansu qataren bana kar nikalne lage

gol-chakkar pe raushan kisi qumqume ke

ujale mein gende ke phulon ne

jab us ke galon pe girti hui

os dekhi to murjha gae

surmai ghas ne

sal ki aaKHiri sham

mein aaj pahli dafa

us ko KHamosh dekha

to nam ho gai

chaaron jaanib utarti hui dhund ne

KHud ko kuchh aur bojhal kiya

us ko logon ki nazron se ojhal kiya

aur wo laDki kahin kho gai