alzheimer mariz ek man ke nam

mujhe ab kuchh na samjhāo na kuchh bhī yaad dilvāo

tumhārī kyā samajh meñ aa.egā maiñ kaun sī duniyā meñ rahtī huuñ

maiñ kitnī muzmahil huuñ khoī khoī huuñ

durushtī se mujhe samjhāo mat maiñ kaun huuñ

tum se mirā rishta hai kyā ye kaun sā ghar hai kahāñ haiñ sab

maiñ bebas huuñ mujhe kyoñ yaad hai aur baaqī manzar dhuñdle dhuñdle haiñ

laḌakpan meñ kabhī ham-joliyoñ ke saath bāteñ kartī rahtī huuñ

kabhī bhaa.ī bahan ke saath bachpan kheltā hai ghar ke āñgan meñ

kabhī dul.han banī maiñ ḳhushbuoñ meñ Duubī hotī huuñ

mujhe samjhāo mat ye saarā dhokā hai

mujhe DāñTo nahīñ maiñ kyā karūñ bolo

mire bas meñ nahīñ hai kuchh

mujhe samjhāo mat

bahlāo

merā haath thāmo pyaar se māthe pe bosa do

yahī kaafī hai mere vāste tum paas ho mere

mujhe samjhāo mat ārām karne do

jahāñ tak āḳhirī manzil hai merī saath do merā sahārā do

mire a.asāb ko ārām karne do

mujhe merī hī duniyā meñ bhaTakne do

yahī kaafī hai mere vāste tum saath ho mere

mujhe ab kuchh na samjhao na kuchh bhi yaad dilwao

tumhaari kya samajh mein aaega main kaun si duniya mein rahti hun

main kitni muzmahil hun khoi khoi hun

durushti se mujhe samjhao mat main kaun hun

tum se mera rishta hai kya ye kaun sa ghar hai kahan hain sab

main bebas hun mujhe kyon yaad hai aur baqi manzar dhundle dhundle hain

laDakpan mein kabhi ham-joliyon ke sath baaten karti rahti hun

kabhi bhai bahan ke sath bachpan khelta hai ghar ke aangan mein

kabhi dulhan bani main KHushbuon mein Dubi hoti hun

mujhe samjhao mat ye sara dhoka hai

mujhe DanTo nahin main kya karun bolo

mere bas mein nahin hai kuchh

mujhe samjhao mat

bahlao

mera hath thamo pyar se mathe pe bosa do

yahi kafi hai mere waste tum pas ho mere

mujhe samjhao mat aaram karne do

jahan tak aaKHiri manzil hai meri sath do mera sahaara do

mere aasab ko aaram karne do

mujhe meri hi duniya mein bhaTakne do

yahi kafi hai mere waste tum sath ho mere