amar

ka.ī saal hue merī zindagī

ḳhizāñ-ālūd vīrān saḌkoñ

pattharoñ se banī tārīk ḳhālī galiyoñ

sunsān jangaloñ

aur jaaḌe meñ jamte kaale dariyāoñ ke kināre guzar rahī hai

vahī dariyā jin meñ maiñ ne

aqīdatoñ meñ bāñdhe ka.ī ta.avīz samjhaute ke naam par bahā diye

vahī saḌkeñ jin kī vīrānī ke sipurd maiñ ne

mohabbatoñ meñ bāñdhe ka.ī va.ade kiye

vahī galiyāñ jin ke pattharoñ pe maiñ ne

ḳhvāhish kī har shakl toḌ dī

vahī jangal jis kī ḳhāmoshī meñ maiñ ne

har sadā.ī kī duā dafnā dī

magar kaale dariyā akasr mujhe ā.īna dikhāne aate haiñ

jis meñ yād-dāshtoñ se ubharte chehroñ ke naqshe bante haiñ

phir mausamī bārishoñ kā koī relā aatā hai

aur sabhī guzashtagān ko palak jhapke bahā le jaatā hai

phir tanhā.ī ke sāhiloñ par mere pair

honiyoñ kī bāqiyāt se Takrāte haiñ

kuchh vajūd maḳhmalīñ ehsās baḳhshte haiñ

baaqī ke asbāb paañv meñ ḳhaar kī tarah chubhte haiñ

nange paañv zindagī guzārnā āsān nahīñ

ki ruuh kī fanā kā amal kahte haiñ

paañv ke angūThe se shurūa hogā

jaan nikalne kā manzar-nāma jitnā bhī haul-nāk ho

kuchh rūheñ kabhī fanā nahīñ hotīñ

aur bechainī un meñ panāh DhūñD letī hai

kai sal hue meri zindagi

KHizan-alud viran saDkon

pattharon se bani tarik KHali galiyon

sunsan jangalon

aur jaDe mein jamte kale dariyaon ke kinare guzar rahi hai

wahi dariya jin mein main ne

aqidaton mein bandhe kai tawiz samjhaute ke nam par baha diye

wahi saDken jin ki virani ke sipurd main ne

mohabbaton mein bandhe kai wade kiye

wahi galiyan jin ke pattharon pe main ne

KHwahish ki har shakl toD di

wahi jangal jis ki KHamoshi mein main ne

har sadai ki dua dafna di

magar kale dariya akasr mujhe aaina dikhane aate hain

jis mein yaad-dashton se ubharte chehron ke naqshe bante hain

phir mausami barishon ka koi rela aata hai

aur sabhi guzashtagan ko palak jhapke baha le jata hai

phir tanhai ke sahilon par mere pair

honiyon ki baqiyat se Takraate hain

kuchh wajud maKHmalin ehsas baKHshte hain

baqi ke asbab panw mein KHar ki tarah chubhte hain

nange panw zindagi guzarna aasan nahin

ki ruh ki fana ka amal kahte hain

panw ke anguThe se shurua hoga

jaan nikalne ka manzar-nama jitna bhi haul-nak ho

kuchh ruhen kabhi fana nahin hotin

aur bechaini un mein panah DhunD leti hai