an-jaana dukh

hare-bhare lahrāte pattoñ vaalā peḌ

indar se kis darja bodā kitnā khokhlā ho saktā hai

mujh se pūchho

maiñ ik aise hī chhitnār ke nīche baiThā

us kī chhāñv se apne safar kī

dhuup kā dukhḌā phuul rahā thā

aane vaale vaqt kī ThanDī giilī miTTī rol rahā thā

apne aap se bol rahā thā

maiñ bhī kitnā ḳhush-qismat huuñ

jīvan kī sunsān Dagar par

mere kitne yaar khaḌe haiñ peḌ kī sūrat

itne meñ ik jhoñkā aayā

ye jhoñkā chāñdī kī kaan ke andar se ho kar aayā thā

ek hī pal meñ

peḌ kī chhāl ne rañgat badlī

ek hī pal meñ

har patte kī shakl huī maTyālī gadlī

shaañ shaañ kartī shāḳhoñ meñ ik zahrīlī sargoshī jaagī

chhāñv chhaT kar peḌ ke tan kī jānib bhāgī

dil ye manzar dekh ke sahmā kāñpā royā

chāroñ aur se uThtī ik anjāne dukh kī dhuul meñ khoyā

zahar sā ik rag rag meñ samāyā

itne meñ ik aur jhūmtā jhoñkā aayā

ye jhoñkā ḳhud-ġharzī ke kohsār pe mañDlā kar aayā thā

bas itnā hī yaad hai mujh ko

kaise aur kab peḌ girā ye peḌ se pūchho

mujhe nikālo

us buude aur khokhle peḌ ke nīche dab kar

mere saath mirā ehsās bhī mar jā.egā

jo bhī ye manzar dekhegā Dar jā.egā

dekhne vāloñ ko is ḳhauf se is sadme is ġham se bachā lo

mujhe nikālo

ā.inda maiñ chhitnār ko apnā yaar nahīñ samjhūñgā

kabhī kabhī mil jaane vaalī chhāñv ko pyaar nahīñ samjhūñgā

hare-bhare lahraate patton wala peD

indar se kis darja boda kitna khokhla ho sakta hai

mujh se puchho

main ek aise hi chhitnar ke niche baiTha

us ki chhanw se apne safar ki

dhup ka dukhDa phul raha tha

aane wale waqt ki ThanDi gili miTTi rol raha tha

apne aap se bol raha tha

main bhi kitna KHush-qismat hun

jiwan ki sunsan Dagar par

mere kitne yar khaDe hain peD ki surat

itne mein ek jhonka aaya

ye jhonka chandi ki kan ke andar se ho kar aaya tha

ek hi pal mein

peD ki chhaal ne rangat badli

ek hi pal mein

har patte ki shakl hui maTyali gadli

shan shan karti shaKHon mein ek zahrili sargoshi jagi

chhanw chhaT kar peD ke tan ki jaanib bhagi

dil ye manzar dekh ke sahma kanpa roya

chaaron aur se uThti ek anjaane dukh ki dhul mein khoya

zahar sa ek rag rag mein samaya

itne mein ek aur jhumta jhonka aaya

ye jhonka KHud-gharzi ke kohsar pe manDla kar aaya tha

bas itna hi yaad hai mujh ko

kaise aur kab peD gira ye peD se puchho

mujhe nikalo

us bude aur khokhle peD ke niche dab kar

mere sath mera ehsas bhi mar jaega

jo bhi ye manzar dekhega Dar jaega

dekhne walon ko is KHauf se is sadme is gham se bacha lo

mujhe nikalo

aainda main chhitnar ko apna yar nahin samjhunga

kabhi kabhi mil jaane wali chhanw ko pyar nahin samjhunga