andesha

abhī fazāoñ meñ taarī hai muztarib sā sukūñ

abhī ḳhalāoñ meñ āvāz guuñj jaatī hai

abhī to rāhguzar par qadam jame bhī nahīñ

abhī to kāñpne lagtā hai dil har aahaT par

safar tavīl bhayānak fazā.eñ dil majbūr

irāde jaise musāfir koī thakan se chuur

mujhe ye Dar hai kahīñ tū bhī saath chhoḌ na de

junūñ meñ aise hazāroñ maqām aa.e the

qadam qadam pe jahāñ nuqra.ī tabassum thā

jahāñ pe husn thā naġhma thā aur tarannum thā

ba-qaid-e-hosh hazāroñ hī jaam aa.e the

harīm-e-nāz se kitne salām aa.e the

vafā ke naam pe lākhoñ payām aa.e the

magar ye husn na thā husn kā dikhāvā thā

vafā ke naam pe jaise hasīn dhokā thā

na jaane kyoñ tirī bātoñ pe e'tibār sā hai

mujhe ye Dar hai kahīñ tū bhī saath chhoḌ na de

abhī ḳhalāoñ meñ āvāz guuñj jaatī hai

abhi fazaon mein tari hai muztarib sa sukun

abhi KHalaon mein aawaz gunj jati hai

abhi to rahguzar par qadam jame bhi nahin

abhi to kanpne lagta hai dil har aahaT par

safar tawil bhayanak fazaen dil majbur

irade jaise musafir koi thakan se chur

mujhe ye Dar hai kahin tu bhi sath chhoD na de

junun mein aise hazaron maqam aae the

qadam qadam pe jahan nuqrai tabassum tha

jahan pe husn tha naghma tha aur tarannum tha

ba-qaid-e-hosh hazaron hi jam aae the

harim-e-naz se kitne salam aae the

wafa ke nam pe lakhon payam aae the

magar ye husn na tha husn ka dikhawa tha

wafa ke nam pe jaise hasin dhoka tha

na jaane kyon teri baaton pe e'tibar sa hai

mujhe ye Dar hai kahin tu bhi sath chhoD na de

abhi KHalaon mein aawaz gunj jati hai