andesha

kis qadar shādāb thā taaza guloñ se ye chaman

kis qadar mahkī huī thī dosto ye anjuman

aaj mahfil ke magar badle hue hālāt haiñ

in nigāhoñ meñ ka.ī jalte hue zarrāt haiñ

sīna-e-tahzīb se girne lagā hai phir lahū

bhar na jaa.eñ zahr-e-qātil se kahīñ jām-o-subū

uḌ na jaa.e chehra-e-insāniyat se rang-o-bū

hamdamo arzāñ nahīñ hotī vatan kī aabrū

apnī āzādī sunahre ḳhvāb kī ta.abīr hai

kitnī hī qurbāniyoñ kī boltī tasvīr hai

azmat-e-hindostāñ yaaro kahīñ kam ho na jaa.e

dosto ye raushnī zulmat meñ phir zam ho na jaa.e

dāman-e-gul ḳhuun kī būñdoñ se phir nam ho na jaa.e

sehn-e-gulshan meñ kahīñ nam-dīda shabnam ho na jaa.e

saaz ke pardoñ meñ zam naġhmāt kī ho zindagī

phir nasīm-e-sub.h se aa.e guloñ meñ tāzgī

phuul aur kāñTe raheñge gulsitāñ ke saath saath

chāñd aur taare raheñge āsmāñ ke saath saath

amn kī taqdīr hai hindostāñ ke saath saath

an-ginat phūloñ se khiltā hī rahegā gulsitāñ

ruk nahīñ saktā kabhī ye zindagī kā kārvāñ

kis qadar shadab tha taza gulon se ye chaman

kis qadar mahki hui thi dosto ye anjuman

aaj mahfil ke magar badle hue haalat hain

in nigahon mein kai jalte hue zarraat hain

sina-e-tahzib se girne laga hai phir lahu

bhar na jaen zahr-e-qatil se kahin jam-o-subu

uD na jae chehra-e-insaniyat se rang-o-bu

hamdamo arzan nahin hoti watan ki aabru

apni aazadi sunahre KHwab ki tabir hai

kitni hi qurbaniyon ki bolti taswir hai

azmat-e-hindostan yaro kahin kam ho na jae

dosto ye raushni zulmat mein phir zam ho na jae

daman-e-gul KHun ki bundon se phir nam ho na jae

sehn-e-gulshan mein kahin nam-dida shabnam ho na jae

saz ke pardon mein zam naghmat ki ho zindagi

phir nasim-e-subh se aae gulon mein tazgi

phul aur kanTe rahenge gulsitan ke sath sath

chand aur tare rahenge aasman ke sath sath

amn ki taqdir hai hindostan ke sath sath

an-ginat phulon se khilta hi rahega gulsitan

ruk nahin sakta kabhi ye zindagi ka karwan