andeshe

jis dil meñ ḳhudā kā ḳhauf rahe bātil se hirāsāñ kyā hogā

jo maut ko ḳhud labbaik kahe vo haq se gurezāñ kyā hogā

ā.īn-e-chaman-bandī bhī nahīñ dastūr-e-navā-sanjī bhī nahīñ

ab is se ziyāda gulshan kā shīrāza pareshāñ kyā hogā

arbāb-e-mohabbat se ye kaho shikve na kareñ kuchh kaam kareñ

jo zulm-o-sitam par itrā.e shikvoñ se pashemāñ kyā hogā

jo log havā ke sāthī haiñ vo apne ḳhudā ke bāġhī haiñ

is jurm-e-baġhāvat se baḌh kar īmān kā nuqsāñ kyā hogā

muddat se kashākash jaarī hai sayyād meñ aur gul-chīnoñ meñ

tanzīm-e-gulistāñ hone tak anjām-e-gulistāñ kyā hogā

jis kashtī kī patvāroñ ko ḳhud mallāhoñ ne toḌā ho

us kashtī ke ham-dardoñ ko phir shikva-e-tūfāñ kyā hogā

jis choT se dil meñ halchal hai aahoñ meñ vo zāhir kyā hogī

siine meñ jo mahshar barpā hai ashkoñ se numāyāñ kyā hogā

is shām-e-ḳhizāñ ne ab tak to har tarh se parda-dārī kī

jab sub.h-e-bahār aa jā.egī ai tangī-e-dāmāñ kyā hogā

jalvat ki ḳhalvat ho 'māhir' dil khoyā khoyā rahtā hai

is ġham kī talāfī kab hogī is dard kā darmāñ kyā hogā

jis dil mein KHuda ka KHauf rahe baatil se hirasan kya hoga

jo maut ko KHud labbaik kahe wo haq se gurezan kya hoga

aain-e-chaman-bandi bhi nahin dastur-e-nawa-sanji bhi nahin

ab is se ziyaada gulshan ka shiraaza pareshan kya hoga

arbab-e-mohabbat se ye kaho shikwe na karen kuchh kaam karen

jo zulm-o-sitam par itrae shikwon se pasheman kya hoga

jo log hawa ke sathi hain wo apne KHuda ke baghi hain

is jurm-e-baghawat se baDh kar iman ka nuqsan kya hoga

muddat se kashakash jari hai sayyaad mein aur gul-chinon mein

tanzim-e-gulistan hone tak anjam-e-gulistan kya hoga

jis kashti ki patwaron ko KHud mallahon ne toDa ho

us kashti ke ham-dardon ko phir shikwa-e-tufan kya hoga

jis choT se dil mein halchal hai aahon mein wo zahir kya hogi

sine mein jo mahshar barpa hai ashkon se numayan kya hoga

is sham-e-KHizan ne ab tak to har tarh se parda-dari ki

jab subh-e-bahaar aa jaegi ai tangi-e-daman kya hoga

jalwat ki KHalwat ho 'mahir' dil khoya khoya rahta hai

is gham ki talafi kab hogi is dard ka darman kya hoga