andhera aur ujala

raakh kā Dher huā jaatā hai derīna mohabbat kā alaav

tīrgī chhāne ko hai saa.e ye mañDlāte haiñ

bazm-e-imkāñ meñ abhī se hai añdherā har-sū

aur us aag se jī Dartā hai

jise paalā thā mirī ruuh kī tanhā.ī ne

thak chukā un ko shikāyat bhī nahīñ

ab faqat siine meñ armānoñ kī afsurda mahak baaqī hai

merī āñkhoñ meñ ab aañsū hoñ yā jalte sho.ale

ḳhatm ho jā.egā ye silsila-e-ahd-e-vafā

zindagī ab to bikhar jā.egī TuuTe hue tāroñ kī tarah

tīrgī chhāne ko hai raah pe qadmoñ ke nishāñ dhuñdle hue jaate haiñ

muzmahil hai rag-e-ehsās ki vo shiddat-e-ehsās yahāñ Duub ga.ī

manzileñ kaaT ke is manzil-e-nāyāb tak aa pahuñchā huuñ

maiñ jahāñ kho sā gayā huuñ vahī nākāmī kī manzil aa.ī

merā anjām to sadiyoñ ke siyah daaġh liye aaya hai

kahiye is dard ko kis dard se Takrānā hai

kitne hī parda-e-zulmāt jinheñ chaak kareñge ham log

tham ke ik baar ye tūfān agar tez huā

kitne hī koh-e-girāñ ḳhaak meñ mil jā.eñge

zindagī dard ke hāthoñ se sañvar saktī hai

raushnī parda-e-zulmat se ubhar saktī hai

rakh ka Dher hua jata hai derina mohabbat ka alaw

tirgi chhane ko hai sae ye manDlate hain

bazm-e-imkan mein abhi se hai andhera har-su

aur us aag se ji Darta hai

jise pala tha meri ruh ki tanhai ne

thak chuka un ko shikayat bhi nahin

ab faqat sine mein armanon ki afsurda mahak baqi hai

meri aankhon mein ab aansu hon ya jalte shoale

KHatm ho jaega ye silsila-e-ahd-e-wafa

zindagi ab to bikhar jaegi TuTe hue taron ki tarah

tirgi chhane ko hai rah pe qadmon ke nishan dhundle hue jate hain

muzmahil hai rag-e-ehsas ki wo shiddat-e-ehsas yahan Dub gai

manzilen kaT ke is manzil-e-nayab tak aa pahuncha hun

main jahan kho sa gaya hun wahi nakaami ki manzil aai

mera anjam to sadiyon ke siyah dagh liye aaya hai

kahiye is dard ko kis dard se Takrana hai

kitne hi parda-e-zulmat jinhen chaak karenge hum log

tham ke ek bar ye tufan agar tez hua

kitne hi koh-e-giran KHak mein mil jaenge

zindagi dard ke hathon se sanwar sakti hai

raushni parda-e-zulmat se ubhar sakti hai