andhera

kitnā gambhīr ghaTā-Top añdherā hai yahāñ

dāġh-e-dil se bhī ujālā nahīñ hone paatā

sho’la-e-āh bhī detā nahīñ lau halkī sī

zindagī jaltī hai mash'al nahīñ jaltī koī

aañsū pighlī huī ātish kī tarah bahte haiñ

aisī ātish ki nahīñ jis meñ zarā sī bhī damak

par tapish aisī ki dozaḳh bhī jhulas kar rah jaa.e

kaisā andher hai vīrānī hai añdhiyārā hai

raat hī raat hai rātoñ kā magar husn nahīñ

koī taarā nahīñ jugnū nahīñ mahtāb nahīñ

is jazīre meñ mirā ghar hai siyah-baḳhtī hai

aur atrāf jazīre ke hai kaalā sāgar

Duub jaate haiñ safīne jahāñ ummīdoñ ke

kitnā gambhīr ghaTā-Top añdherā hai yahāñ

kitna gambhir ghaTa-Top andhera hai yahan

dagh-e-dil se bhi ujala nahin hone pata

sho’la-e-ah bhi deta nahin lau halki si

zindagi jalti hai mash'al nahin jalti koi

aansu pighli hui aatish ki tarah bahte hain

aisi aatish ki nahin jis mein zara si bhi damak

par tapish aisi ki dozaKH bhi jhulas kar rah jae

kaisa andher hai virani hai andhiyara hai

raat hi raat hai raaton ka magar husn nahin

koi tara nahin jugnu nahin mahtab nahin

is jazire mein mera ghar hai siyah-baKHti hai

aur atraf jazire ke hai kala sagar

Dub jate hain safine jahan ummidon ke

kitna gambhir ghaTa-Top andhera hai yahan