andheri basti

vaqt shāhid hai ki har daur meñ tahzīb kī maañg

qatl-gāhoñ ke tabassum se shafaq-rang rahī

jin ke ḳhuuñ se hai ruḳh-e-zīst kī rangat un kī

bhuuk iflās kī nāgin se sadā jang rahī

jin kī mehnat se hai mahloñ ke makīnoñ kā ġhurūr

zindagī un ke liye dukh kī añdherī bastī

luuT qudrat kī mashiyyat hai ḳhudā kā manshā

is khule jhuuT kī tā.īd nahīñ ho saktī

dhuup kī ātishīñ chādar meñ jhulastā huā jism

kitnī sadiyoñ se hai tārīḳh-e-tashaddud kā jamāl

hukm hai maqtal-o-zindāñ ke nigahbānoñ kā

ādamiyyat ke taqaddus kā uThāo na savāl

ishrat-e-zīst muqayyad rahī aivānoñ meñ

ahl-e-mehnat ke liye dard kā sarmāya hai

chand afrād ne fitrat kā taqāzā kah kar

zulm ko ishq kī taqdīr banā rakkhā hai

ḳhauf ke abr se insāf kī shabnam barse

is haqīqat kī haqīqat ko koī kyā samjhe

lūTne vaale ḳhudāyān-e-jahāñ Thahre haiñ

is tamaddun ke taqaddus ko bhalā kyā kahiye

jhuuT har sach kī hai buniyād jahāñ kyā kahiye

jurm iz.hār-e-sadāqat hai yahāñ kyā kahiye

waqt shahid hai ki har daur mein tahzib ki mang

qatl-gahon ke tabassum se shafaq-rang rahi

jin ke KHun se hai ruKH-e-zist ki rangat un ki

bhuk iflas ki nagin se sada jang rahi

jin ki mehnat se hai mahlon ke makinon ka ghurur

zindagi un ke liye dukh ki andheri basti

luT qudrat ki mashiyyat hai KHuda ka mansha

is khule jhuT ki taid nahin ho sakti

dhup ki aatishin chadar mein jhulasta hua jism

kitni sadiyon se hai tariKH-e-tashaddud ka jamal

hukm hai maqtal-o-zindan ke nigahbanon ka

aadamiyyat ke taqaddus ka uThao na sawal

ishrat-e-zist muqayyad rahi aiwanon mein

ahl-e-mehnat ke liye dard ka sarmaya hai

chand afrad ne fitrat ka taqaza kah kar

zulm ko ishq ki taqdir bana rakkha hai

KHauf ke abr se insaf ki shabnam barse

is haqiqat ki haqiqat ko koi kya samjhe

luTne wale KHudayan-e-jahan Thahre hain

is tamaddun ke taqaddus ko bhala kya kahiye

jhuT har sach ki hai buniyaad jahan kya kahiye

jurm izhaar-e-sadaqat hai yahan kya kahiye