anguThi

chhupā.ūñ kyoñ na dil meñ ḳhātam-e-gauhar nigār us kī

yahī le de ke mere paas hai ik yādgār us kī

ye tanhā.ī meñ mere lab tak aakar muskurātī hai

aur apnī mālika kī tarah dil ko gudgudātī hai

qalam ke saath mere haath meñ har-vaqt rahtī hai

aur us ke dast-e-rangīñ ke fasāne mujh se kahtī hai

tilā.ī ungliyoñ kā jab mujhe qissa sunātī hai

tasavvur meñ sitāroñ ke se paikar khīñch laatī hai

mirī salmā ko is ne shaad aur nāshād dekhā hai

gahe masrūr gaahe mā.il-e-fariyād dekhā hai

ise mā'lūm haiñ achchhī tarah betābiyāñ us kī

nahīñ poshīda is kī aañkh se be-ḳhvābiyāñ us kī

shab-e-tanhā.ī meñ is ne use bedār paayā hai

aur aksar dīda-e-sarshār ko ḳhūñ-bār paayā hai

ise mā'lūm hai vo kis tarah maġhmūm rahtī thī

kisī ke ġham meñ lutf-e-zīst se mahrūm rahtī thī

mirā ḳhat paḌh ke vo kis naaz se masrūr hotī thī

phir apnī bebasī par kis tarah ranjūr hotī thī

ye shāhid hai ki us kī shām-e-ġham kyūñkar guzartī thī

ye shāhid hai ki vo ro ro ke kyūñkar sub.h kartī thī

vo jab dil thaam letī thī hujūm-e-ġham se ghabrā kar

to ye kartī thī us kī ġham-gusārī us ke paas aakar

ise mā'lūm hai jo dard thā us paak siine meñ

basī haiñ us ke dil kī dhaḌkaneñ is ke nagīne meñ

pahuñchtī haiñ shuā.eñ is kī jis dam chashm-e-hairāñ tak

tasavvur mujh ko le uḌtā hai salmā ke shabistāñ tak

jahāñ salmā ke aur mere sivā hotā nahīñ koī

añgūThī khoī jaatī hai magar khotā nahīñ koī

chhupaun kyon na dil mein KHatam-e-gauhar nigar us ki

yahi le de ke mere pas hai ek yaadgar us ki

ye tanhai mein mere lab tak aakar muskuraati hai

aur apni malika ki tarah dil ko gudgudati hai

qalam ke sath mere hath mein har-waqt rahti hai

aur us ke dast-e-rangin ke fasane mujh se kahti hai

tilai ungliyon ka jab mujhe qissa sunati hai

tasawwur mein sitaron ke se paikar khinch lati hai

meri salma ko is ne shad aur nashad dekha hai

gahe masrur gahe mail-e-fariyaad dekha hai

ise ma'lum hain achchhi tarah betabiyan us ki

nahin poshida is ki aankh se be-KHwabiyan us ki

shab-e-tanhai mein is ne use bedar paya hai

aur aksar dida-e-sarshaar ko KHun-bar paya hai

ise ma'lum hai wo kis tarah maghmum rahti thi

kisi ke gham mein lutf-e-zist se mahrum rahti thi

mera KHat paDh ke wo kis naz se masrur hoti thi

phir apni bebasi par kis tarah ranjur hoti thi

ye shahid hai ki us ki sham-e-gham kyunkar guzarti thi

ye shahid hai ki wo ro ro ke kyunkar subh karti thi

wo jab dil tham leti thi hujum-e-gham se ghabra kar

to ye karti thi us ki gham-gusari us ke pas aakar

ise ma'lum hai jo dard tha us pak sine mein

basi hain us ke dil ki dhaDkanen is ke nagine mein

pahunchti hain shuaen is ki jis dam chashm-e-hairan tak

tasawwur mujh ko le uDta hai salma ke shabistan tak

jahan salma ke aur mere siwa hota nahin koi

anguThi khoi jati hai magar khota nahin koi