anjam qissa-go ka

purānī baat hai

lekin ye anhonī sī lagtī hai

vo shab va.ade kī shab thī

gaañv kī chaupāl puurī bhar chukī thī

taaza huqqe har taraf rakkhe hue the

qissa-go ne ek shab pahle kahā thā

sāhibo tum apnī nīndeñ bistaraoñ par chhoḌ kar aanā

maiñ kal kī shab tumheñ apne salaf kā āḳhirī qissa sunā.ūñgā

jigar ko thaam kar kal raat tum chaupāl par aanā

vo shab va.ade kī shab thī

gaañv kī chaupāl puurī bhar chukī thī

raat gahrī ho chalī thī

huqqe ThanDe ho ga.e the lālTeneñ bujh ga.ī thiiñ

gaañv ke sab mard qissa-go kī raah takte thak ga.e the

duur tārīkī meñ gīdaḌ aur kutte mil ke nauha kar rahe the

daf.atan bijlī sī kaundī

raushnī meñ sab ne dekhā

qissa-go bargad tale behis paḌā thā

us kī āñkheñ āḳhirī qissa sunāne kī taḌap meñ jāgtī thiiñ

par zabāñ us kī kaTī thī

raat vo bas āḳhirī thī

qissa-go kā an-kahā apne salaf kā

āḳhirī qissa laboñ par kāñptā thā

purani baat hai

lekin ye anhoni si lagti hai

wo shab wade ki shab thi

ganw ki chaupal puri bhar chuki thi

taza huqqe har taraf rakkhe hue the

qissa-go ne ek shab pahle kaha tha

sahibo tum apni ninden bistaraon par chhoD kar aana

main kal ki shab tumhein apne salaf ka aaKHiri qissa sunaunga

jigar ko tham kar kal raat tum chaupal par aana

wo shab wade ki shab thi

ganw ki chaupal puri bhar chuki thi

raat gahri ho chali thi

huqqe ThanDe ho gae the lalTenen bujh gai thin

ganw ke sab mard qissa-go ki rah takte thak gae the

dur tariki mein gidaD aur kutte mil ke nauha kar rahe the

dafatan bijli si kaundi

raushni mein sab ne dekha

qissa-go bargad tale behis paDa tha

us ki aankhen aaKHiri qissa sunane ki taDap mein jagti thin

par zaban us ki kaTi thi

raat wo bas aaKHiri thi

qissa-go ka an-kaha apne salaf ka

aaKHiri qissa labon par kanpta tha