anjaan dukh

blood moon kī raat ko

merī āñkhoñ meñ bhī

ḳhuun utrā thā

dard kī shiddat kuchh ziyāda thī

soch rahā thā

aisā kyoñ hai

rishta kyā hai

mīloñ duur jab chāñd kī rangat ḳhuun kī mānind surḳh ho jaa.e

dhartī par merī āñkhoñ meñ laalī kyūñkar

aa jaatī hai

dhartī par mere siine meñ dard kī shiddat baḌh jaatī hai

chāñd kā dukh tanhā.ī hogā

merā dukh lekin kuchh aur hai

jis se dil ghabrā jaatā hai

merā dukh tanhā.ī nahīñ hai

is dhartī par

gar maiñ chāhūñ

ik be-kār shaġhl ko le kar

jiine kā be-kār bahāna

DhūñD hī lūñgā

gar maiñ chāhūñ

duniyā ke is shor meñ ḳhud ko

logoñ kī is bhiiḌ meñ ḳhud ko

kho saktā huuñ

lekin aisā karne se is dard kī shiddat

kam hogī kyā

chāñd kā dukh tanhā.ī hogā

merā dukh na jaane kyā hai

blood moon ki raat ko

meri aankhon mein bhi

KHun utra tha

dard ki shiddat kuchh ziyaada thi

soch raha tha

aisa kyon hai

rishta kya hai

milon dur jab chand ki rangat KHun ki manind surKH ho jae

dharti par meri aankhon mein lali kyunkar

aa jati hai

dharti par mere sine mein dard ki shiddat baDh jati hai

chand ka dukh tanhai hoga

mera dukh lekin kuchh aur hai

jis se dil ghabra jata hai

mera dukh tanhai nahin hai

is dharti par

gar main chahun

ek be-kar shaghl ko le kar

jine ka be-kar bahana

DhunD hi lunga

gar main chahun

duniya ke is shor mein KHud ko

logon ki is bhiD mein KHud ko

kho sakta hun

lekin aisa karne se is dard ki shiddat

kam hogi kya

chand ka dukh tanhai hoga

mera dukh na jaane kya hai