apna apna shahr

hamāre diloñ meñ kuchh Dūbtā jā rahā hai

mere aur tumhāre

vo kyā hai

kyā ham us ke bhed pā sakte haiñ

kohre kī sard chādar ne

jangal ko apne saa.e meñ le liyā hai

koī āvāz nahīñ

sirf ek gahrī mahak

koī mere dil meñ lobān kī dhūnī detā hai

aur āñkheñ jalne lagtī haiñ

ham dhāre ke muqābil nahīñ tair sakte

aur dhāre ke saath bhī nahīñ

ki mujh meñ ek samundar hai

aur tum meñ dūsrā

tum mere liye kashtī nahīñ banā sake

aur maiñ ne tumhārī kashtī kināre se khol dī

ab koī rāsta nahīñ

ham nafrat ke liye javāz talāsh kar lete haiñ

aur is tarah apnī shikast ko taslīm karte haiñ

aur Duub jaate haiñ

apne apne samundar meñ

hamare dilon mein kuchh Dubta ja raha hai

mere aur tumhaare

wo kya hai

kya hum us ke bhed pa sakte hain

kohre ki sard chadar ne

jangal ko apne sae mein le liya hai

koi aawaz nahin

sirf ek gahri mahak

koi mere dil mein loban ki dhuni deta hai

aur aankhen jalne lagti hain

hum dhaare ke muqabil nahin tair sakte

aur dhaare ke sath bhi nahin

ki mujh mein ek samundar hai

aur tum mein dusra

tum mere liye kashti nahin bana sake

aur main ne tumhaari kashti kinare se khol di

ab koi rasta nahin

hum nafrat ke liye jawaz talash kar lete hain

aur is tarah apni shikast ko taslim karte hain

aur Dub jate hain

apne apne samundar mein