apna ghar

sūraj chāñd sitāre

fazā kī qaus meñ Tañge

hare motī javāhar panne

āsmānoñ kī lā-mahdūd ḳhalā meñ chamaktī damaktī devtāoñ kī mehrbān nuurī āñkheñ

vahīñ kahīñ

unhīñ ke mābain hai

merā ghar

mere abbā kī havelī

jis ke āñgan ke ḳhāmosh be-āvāz naġhme

ziina ziina utar aa.e dhartī par aur

aa jame

mere dil ko ḳhālī aur vīrāñ pā kar aur

gahrī aTuuT samādhī meñ ram kar yugoñ vahīñ baiThe rahe

merī āñkhoñ kā nūr-o-surūr

mere kānoñ kā sangīt

mere hoñToñ par machaltī dhuneñ

unhīñ kī tausī.a haiñ

masarrat ke nashe meñ

mahak mahak uThte haiñ mere qalb-o-jigar aur

chahak chahak kar gungunāte haiñ

apne ābā.ī giit

jo mafhūm se māvarā haiñ

jin meñ dhun to hai

shabd nahīñ

in gūñge naġhmoñ kā jaadū

khol detā hai vo dayār

jin ke pīchhe chhupā merā mahbūb

tab se merā muntazir hai

jab se maiñ us se ruuTh kar zindagī kī talāsh-e-bejā meñ is dhartī par chalā aaya thā

phir kisī din

kisī ek mubārak saa.at meñ jo us ne pahle hī se nirdhārit kar rakhī hai

janam-janmāntar kī us kī samādhī TūTtī hai aur vo āñkheñ kholtā hai

muskurā kar merī āñkhoñ meñ jhāñktā hai

pahchān liyā na ham ne tujhe bhagoḌe

chal ab ghar chaleñ

suraj chand sitare

faza ki qaus mein Tange

hare moti jawahar panne

aasmanon ki la-mahdud KHala mein chamakti damakti dewtaon ki mehrban nuri aankhen

wahin kahin

unhin ke mabain hai

mera ghar

mere abba ki haweli

jis ke aangan ke KHamosh be-awaz naghme

zina zina utar aae dharti par aur

aa jame

mere dil ko KHali aur viran pa kar aur

gahri aTuT samadhi mein ram kar yugon wahin baiThe rahe

meri aankhon ka nur-o-surur

mere kanon ka sangit

mere honTon par machalti dhunen

unhin ki tausia hain

masarrat ke nashe mein

mahak mahak uThte hain mere qalb-o-jigar aur

chahak chahak kar gungunate hain

apne aabai git

jo mafhum se mawara hain

jin mein dhun to hai

shabd nahin

in gunge naghmon ka jadu

khol deta hai wo dayar

jin ke pichhe chhupa mera mahbub

tab se mera muntazir hai

jab se main us se ruTh kar zindagi ki talash-e-beja mein is dharti par chala aaya tha

phir kisi din

kisi ek mubarak saat mein jo us ne pahle hi se nirdhaarit kar rakhi hai

janam-janmantar ki us ki samadhi TuTti hai aur wo aankhen kholta hai

muskura kar meri aankhon mein jhankta hai

pahchan liya na hum ne tujhe bhagoDe

chal ab ghar chalen