aql se leta na kaam agar

Topiyoñ kī ek gaThrī bāñdh kar

kar liyā ek shaḳhs ne azm-e-safar

rāsta itnā na thā dushvār-tar

thak gayā vo raah meñ phir bhī magar

peḌ dekhā rāste meñ sāya-dār

saañs lenā chāhā us ne leT kar

saath hī bahtī thī ik nadī vahāñ

paanī jis meñ thā ravāñ shaffāf-tar

leTte hī niiñd us ko aa ga.ī

maal se apne huā vo be-ḳhabar

peḌ par bandar the kuchh baiThe hue

jab paḌī gaThrī pe un sab kī nazar

dhīre dhīre nīche utre aur vo

le ga.e gaThrī uThā kar peḌ par

khol kar gaThrī pahan liiñ Topiyāñ

jach rahe the Topiyoñ meñ jānvar

shor karne lag ga.e bandar bahut

jaag uThā jo so rahā thā be-ḳhabar

us ne jab gaThrī na dekhī ās-pās

dil meñ ye sochā ga.ī gaThrī kidhar

peḌ par us ne jo dekhā ġhaur se

aa.e bandar Topiyāñ pahne nazar

Topiyāñ paane kī koshish us ne kī

mil na paayā jab use koī samar

apne sar se apnī Topī ko utaar

pheñk dī ġhusse meñ us ne ghaas par

sab ne pheñkīñ apnī apnī Topiyāñ

bandaroñ par ye huā us kā asar

jam.a kar liiñ us ne apnī Topiyāñ

sū-e-manzil bāñdh lī phir us ne kamar

Topiyāñ kaise 'ufuq' miltīñ use

aql se letā na kaam apnī agar

Topiyon ki ek gaThri bandh kar

kar liya ek shaKHs ne azm-e-safar

rasta itna na tha dushwar-tar

thak gaya wo rah mein phir bhi magar

peD dekha raste mein saya-dar

sans lena chaha us ne leT kar

sath hi bahti thi ek nadi wahan

pani jis mein tha rawan shaffaf-tar

leTte hi nind us ko aa gai

mal se apne hua wo be-KHabar

peD par bandar the kuchh baiThe hue

jab paDi gaThri pe un sab ki nazar

dhire dhire niche utre aur wo

le gae gaThri uTha kar peD par

khol kar gaThri pahan lin Topiyan

jach rahe the Topiyon mein jaanwar

shor karne lag gae bandar bahut

jag uTha jo so raha tha be-KHabar

us ne jab gaThri na dekhi aas-pas

dil mein ye socha gai gaThri kidhar

peD par us ne jo dekha ghaur se

aae bandar Topiyan pahne nazar

Topiyan pane ki koshish us ne ki

mil na paya jab use koi samar

apne sar se apni Topi ko utar

phenk di ghusse mein us ne ghas par

sab ne phenkin apni apni Topiyan

bandaron par ye hua us ka asar

jama kar lin us ne apni Topiyan

su-e-manzil bandh li phir us ne kamar

Topiyan kaise 'ufuq' miltin use

aql se leta na kaam apni agar