art-gallery main ek taswir

sub.h savere saḌkoñ par jaate ūñToñ ke gale meñ

boltī ghanTī kī āvāz havā ke tīroñ se zaḳhmī hai

aur kisī kī nazar nahīñ hai

duur safar par ga.e huoñ ke rastoñ par an-ginat duā.eñ bichhī huī haiñ

aur kisī ko ḳhabar nahīñ hai

sab dekhe an-dekhe dukh

āseb-zada tahrīroñ ko chehre par milte phirte haiñ

aur ka.ī baras se yuuñ hotā hai

dariyā sonā miTTī pīchhe chhoḌ aate haiñ

sahrā ko ābādī ke sāhil par phailāte aage baḌh jaate haiñ

rizq ke pīchhe bhāgtī āñkheñ jismoñ ke Dhāñchoñ meñ ulajh ga.ī haiñ

koī bisāt-e-vaqt pe rakkhe mohroñ ko chalne se pahle

ek nazar in sab chehroñ par Dāltā hai

phir ik mohara chal detā hai

duur pahāḌoñ ke us jānib jaltā sūraj raat ke ḳhemoñ meñ chup baiThā

aane vaale kal kī bābat soch rahā hai

subh sawere saDkon par jate unTon ke gale mein

bolti ghanTi ki aawaz hawa ke tiron se zaKHmi hai

aur kisi ki nazar nahin hai

dur safar par gae huon ke raston par an-ginat duaen bichhi hui hain

aur kisi ko KHabar nahin hai

sab dekhe an-dekhe dukh

aaseb-zada tahriron ko chehre par milte phirte hain

aur kai baras se yun hota hai

dariya sona miTTi pichhe chhoD aate hain

sahra ko aabaadi ke sahil par phailate aage baDh jate hain

rizq ke pichhe bhagti aankhen jismon ke Dhanchon mein ulajh gai hain

koi bisat-e-waqt pe rakkhe mohron ko chalne se pahle

ek nazar in sab chehron par Dalta hai

phir ek mohara chal deta hai

dur pahaDon ke us jaanib jalta suraj raat ke KHemon mein chup baiTha

aane wale kal ki babat soch raha hai