asas

hamāre andar

bahut sī qadreñ bahut se ehsās mushtarak haiñ

azal hamārā likhā gayā ḳhaak kī sadā se

vajūd āb-e-ravāñ kā paikar

havā se hai rishta-e-sadāqat

hai aag se ḳhuun meñ tamāzat

na tum mukammal na ham mukammal

adhūre tum bhī adhūre ham bhī

kabhī yaqīñ haiñ kabhī gumāñ haiñ

kahīñ zabāñ haiñ kahīñ bayāñ haiñ

shikasta lamhoñ ke pāsbāñ haiñ

bujhe bujhe se Dare Dare se

gunāh sāñsoñ meñ pālte haiñ

zamīñ pe paanī uchhālte haiñ

sukūn ehsās kī talab meñ

khaḌe haiñ sahrā-e-roz-o-shab meñ

haiñ ek jaisī hamārī ḳhushiyāñ hamāre aañsū

hamārī rangat hamārī ḳhushbū

hamārī tah meñ haiñ ek jaise ka.ī shu.ūr-e-nazar ke pahlū

hamārī bāteñ bhī ek jaisī

basīratoñ kī talāsh meñ gum

havāoñ ke irti.āsh meñ gum

hamesha fikr-e-ma.āsh meñ gum

safar hamārā likhā hai zulmāt ke ufuq par

bahā.e aañsū shaguftagī se lipaT lipaT kar

ḳhud apne naqsh-e-qadam gine haiñ palaT palaT kar

hayāt se rah ga.e haiñ kaT kar

hamārī saarī zarūrateñ bhī haiñ ek jaisī

mohabbateñ bhī sadāqateñ bhī

numā.isheñ bhī rifāqateñ bhī

hamāre sīnoñ meñ zau-fishāñ haiñ

lahū kī sūrat hamāre andar ravāñ-davāñ haiñ

tumheñ jo ġham hai usī ne aksar mujhe chhuā hai

hayāt kā kā.enāt kā ġham

tahārat-e-vājibāt kā ġham

taqaddus-e-iltifāt kā ġham

magar ye lagtā hai har qadam par

tamām sachchā.iyāñ pahan kar

diloñ kī gahrā.iyāñ pahan kar

vafā kī parchhā.iyāñ pahan kar

hamāre andar hazār-hā fāsle to ab tak bichhe hue haiñ

kahīñ usūloñ kī dhuup dil ko tapā rahī hai

kahīñ aqā.ed kī āñdhiyāñ haiñ

kahīñ ḳhudī rāste kā patthar

anā kahīñ sar pe sāya-afgan

na tum hamāre na ham tumhāre

ghuTan hamāre nasīb meñ hai

na jī rahe haiñ na mar rahe haiñ

ḳhud apne saa.e se Dar rahe haiñ

qarīb rah kar judā judā haiñ

ġhamoñ meñ Duubī koī sadā haiñ

ḳhud apne idrāk se ḳhafā haiñ

pas-e-vafā naqsh-e-bevafā haiñ

hamāre andar

abhī bhī sadiyoñ kī dūriyāñ haiñ

abhī bhī sadiyoñ ke fāsle haiñ

adhūre tum bhī adhūre ham bhī

na aas koī sukūn dil kī

na raushnī kā koī asāsa

kahīñ nahīñ silsila yaqīñ kā

nasīb hogā kise ḳhirāj-e-nigāh-e-ulfat

kise pata ki kahāñ milegī zamīñ pe qurbat

tum apne ghar meñ ham apne ghar meñ

udaas tum bhī udaas ham bhī

barahna-pā be-libās ham bhī

haiñ be-karāñ fāsloñ kī zad meñ

ġhamoñ kī zad meñ

na tum salāmat na ham salāmat

yahī muqaddar yahī sadāqat

yahī hai bas āḳhirī haqīqat

ki ḳhvāb sī lag rahī hai ab raushnī kī saa.at

hamare andar

bahut si qadren bahut se ehsas mushtarak hain

azal hamara likha gaya KHak ki sada se

wajud aab-e-rawan ka paikar

hawa se hai rishta-e-sadaqat

hai aag se KHun mein tamazat

na tum mukammal na hum mukammal

adhure tum bhi adhure hum bhi

kabhi yaqin hain kabhi guman hain

kahin zaban hain kahin bayan hain

shikasta lamhon ke pasban hain

bujhe bujhe se Dare Dare se

gunah sanson mein palte hain

zamin pe pani uchhaalte hain

sukun ehsas ki talab mein

khaDe hain sahra-e-roz-o-shab mein

hain ek jaisi hamari KHushiyan hamare aansu

hamari rangat hamari KHushbu

hamari tah mein hain ek jaise kai shuur-e-nazar ke pahlu

hamari baaten bhi ek jaisi

basiraton ki talash mein gum

hawaon ke irtiash mein gum

hamesha fikr-e-maash mein gum

safar hamara likha hai zulmat ke ufuq par

bahae aansu shaguftagi se lipaT lipaT kar

KHud apne naqsh-e-qadam gine hain palaT palaT kar

hayat se rah gae hain kaT kar

hamari sari zaruraten bhi hain ek jaisi

mohabbaten bhi sadaqaten bhi

numaishen bhi rifaqaten bhi

hamare sinon mein zau-fishan hain

lahu ki surat hamare andar rawan-dawan hain

tumhein jo gham hai usi ne aksar mujhe chhua hai

hayat ka kaenat ka gham

tahaarat-e-wajibaat ka gham

taqaddus-e-iltifat ka gham

magar ye lagta hai har qadam par

tamam sachchaiyan pahan kar

dilon ki gahraiyan pahan kar

wafa ki parchhaiyan pahan kar

hamare andar hazar-ha fasle to ab tak bichhe hue hain

kahin usulon ki dhup dil ko tapa rahi hai

kahin aqaed ki aandhiyan hain

kahin KHudi raste ka patthar

ana kahin sar pe saya-afgan

na tum hamare na hum tumhaare

ghuTan hamare nasib mein hai

na ji rahe hain na mar rahe hain

KHud apne sae se Dar rahe hain

qarib rah kar juda juda hain

ghamon mein Dubi koi sada hain

KHud apne idrak se KHafa hain

pas-e-wafa naqsh-e-bewafa hain

hamare andar

abhi bhi sadiyon ki duriyan hain

abhi bhi sadiyon ke fasle hain

adhure tum bhi adhure hum bhi

na aas koi sukun dil ki

na raushni ka koi asasa

kahin nahin silsila yaqin ka

nasib hoga kise KHiraj-e-nigah-e-ulfat

kise pata ki kahan milegi zamin pe qurbat

tum apne ghar mein hum apne ghar mein

udas tum bhi udas hum bhi

barahna-pa be-libas hum bhi

hain be-karan faslon ki zad mein

ghamon ki zad mein

na tum salamat na hum salamat

yahi muqaddar yahi sadaqat

yahi hai bas aaKHiri haqiqat

ki KHwab si lag rahi hai ab raushni ki saat