asar paida kar

jabr kā daur hai aahoñ meñ asar paidā kar

zulmat-e-shab se hī āsār-e-sahar paidā kar

jaur-e-maġhrib se na andāz-e-hazar paidā kar

taḳht-e-bātil jo ulaT deñ vo bashar paidā kar

ġhair ko apnā banā le vo nazar paidā kar

sang-rezoñ se guhar-pāsh guhar paidā kar

ik nazar dekh ke tū bhāñp le maqsad dil kā

chashm-e-bīnā meñ tafakkur kā asar paidā kar

apnī duniyā tujhe duniyā se banānī hai alag

āsmāñ taare zamīñ shams-o-qamar paidā kar

hai tirā ḳhvāb-e-girāñ dūrī-e-manzil kā sabab

ḳhizr hamdard hai uTh azm-e-safar paidā kar

kyoñ zamāne ke ḳham-o-pech meñ uljhā hai tū

dil meñ ehsās-e-tabāhī-o-zarar paidā kar

ġham-e-shamshīr hai kyā dast-tahī uTh nādāñ

tū bahādur hai to be teġh zafar paidā kar

aarzū jis kī tujhe hai vo nihāñ hai tujh meñ

dekhnā ho to sadāqat kī nazar paidā kar

quvvateñ arz-o-samā kī haiñ tirī fitrat meñ

shāḳh-e-ummīd pe maqsad kā samar paidā kar

apne īsār kā le sang-diloñ se badla

baat to jab hai ki patthar se guhar paidā kar

kyoñ hai māyūsī-e-paiham se tirā dil māyūs

be-ḳhabar apnī duāoñ meñ asar paidā kar

qaid ḳhurshīd-e-falak-tāb kī kirneñ kar le

mustaqil apnī shab-e-ġham meñ sahar paidā kar

jins-e-ulfat kī jo darkār ḳharīdārī hai

mīThā mīThā sā zarā dard-e-jigar paidā kar

azm-e-rāsiḳh ho ūlul-azm ho pahle ġhāfil

phir agar chāhe to patthar se sharar paidā kar

hai tasarruf meñ tire dahr kī har chiiz 'razī'

uTh aur uTh kar inhīñ zarroñ se qamar paidā kar

jabr ka daur hai aahon mein asar paida kar

zulmat-e-shab se hi aasar-e-sahar paida kar

jaur-e-maghrib se na andaz-e-hazar paida kar

taKHt-e-baatil jo ulaT den wo bashar paida kar

ghair ko apna bana le wo nazar paida kar

sang-rezon se guhar-pash guhar paida kar

ek nazar dekh ke tu bhanp le maqsad dil ka

chashm-e-bina mein tafakkur ka asar paida kar

apni duniya tujhe duniya se banani hai alag

aasman tare zamin shams-o-qamar paida kar

hai tera KHwab-e-giran duri-e-manzil ka sabab

KHizr hamdard hai uTh azm-e-safar paida kar

kyon zamane ke KHam-o-pech mein uljha hai tu

dil mein ehsas-e-tabahi-o-zarar paida kar

gham-e-shamshir hai kya dast-tahi uTh nadan

tu bahadur hai to be tegh zafar paida kar

aarzu jis ki tujhe hai wo nihan hai tujh mein

dekhna ho to sadaqat ki nazar paida kar

quwwaten arz-o-sama ki hain teri fitrat mein

shaKH-e-ummid pe maqsad ka samar paida kar

apne isar ka le sang-dilon se badla

baat to jab hai ki patthar se guhar paida kar

kyon hai mayusi-e-paiham se tera dil mayus

be-KHabar apni duaon mein asar paida kar

qaid KHurshid-e-falak-tab ki kirnen kar le

mustaqil apni shab-e-gham mein sahar paida kar

jins-e-ulfat ki jo darkar KHaridari hai

miTha miTha sa zara dard-e-jigar paida kar

azm-e-rasiKH ho ulul-azm ho pahle ghafil

phir agar chahe to patthar se sharar paida kar

hai tasarruf mein tere dahr ki har chiz 'razi'

uTh aur uTh kar inhin zarron se qamar paida kar