ashnan

jab nuur ke parde se haTā parda-e-zulmāt

jab sub.h ke māthe se miTī gard-e-ḳhurāfāt

pau phūTne vaalī thī to mashriq thā hinā.ī

milne ko thī duniyā ko shuāoñ kī badhā.ī

sahmī huī utrī to thī ākāsh se shabnam

ġhunchoñ ko tabassum kā vo paiġhām thī tāham

kaliyoñ ko jo badmast havā chuum rahī thī

is chheḌ par har shāḳh-e-chaman jhuum rahī thī

chiḌiyoñ kī chahak duur se detī thī sunā.ī

uḌne kī jasārat abhī un meñ na thī aa.ī

sabza kahīñ chup-chāp guhar rol rahā thā

gul hañs ke kahīñ band-e-qabā khol rahā thā

fitrat ke pujārī bhī bahut jaag chuke the

sairoñ ke liye log bhī kuchh bhaag chuke the

taqdīs ke pāband bhī gangā ke kināre

jaate the kahīñ tez kahīñ sust bechāre

puujā koī kartā thā tilak koī banātā

jal haath meñ letā koī māthe pe lagātā

itne meñ numāyāñ huā ik paikar-e-nūrī

qadmoñ meñ shafaq jis ke paḌī bahr-e-huzūrī

sāñche meñ Dhale jaise ki andām the saare

lapke vo qadam chūmne bahte hue dhāre

bojhal thī palak niiñd ke be-sāḳhta-pan se

chhuTtī thī kiran jaise ki har mū-e-badan se

thālī jo uThā.e thī to dil vāloñ ko mahmez

mahjūb huā dekh ke ḳhurshīd-e-sahar-ḳhez

saarī kī sañbhāle hue chuTkī se thī chūnan

baḌhtī thī use dekh ke har qalb kī dhaḌkan

dariyā meñ dhare paañv baḌe nāz-o-adā se

pariyāñ sī lapakne lagīñ paanī kī ridā se

ruk ruk ke jo do-chār qadam aur baḌhā.e

chūnan ko sañbhāle hue thālī ko uThā.e

nazrāna diyā phuul kā amvāj ko us ne

thālī ko liyā ḳhādima-e-ḳhās ne baḌh ke

phir āb-e-muqaddas meñ jo Dubkī sī lagā.ī

badlī sī zarā der ko mahtāb pe chhā.ī

paanī se parī par ko jhaTaktī huī niklī

andām-e-gul-andām se lipTī huī saarī

motī se baraste the har ik mū-e-siyah se

shabnam ke vo qatre the kañval par jo paḌe the

vo mast-e-ḳhirām aa.ī usī taur ga.ī bhī

par barq-e-tapāñ ḳhirman-e-hastī par girī bhī

jab nur ke parde se haTa parda-e-zulmat

jab subh ke mathe se miTi gard-e-KHurafat

pau phuTne wali thi to mashriq tha hinai

milne ko thi duniya ko shuaon ki badhai

sahmi hui utri to thi aakash se shabnam

ghunchon ko tabassum ka wo paigham thi taham

kaliyon ko jo badmast hawa chum rahi thi

is chheD par har shaKH-e-chaman jhum rahi thi

chiDiyon ki chahak dur se deti thi sunai

uDne ki jasarat abhi un mein na thi aai

sabza kahin chup-chap guhar rol raha tha

gul hans ke kahin band-e-qaba khol raha tha

fitrat ke pujari bhi bahut jag chuke the

sairon ke liye log bhi kuchh bhag chuke the

taqdis ke paband bhi ganga ke kinare

jate the kahin tez kahin sust bechaare

puja koi karta tha tilak koi banata

jal hath mein leta koi mathe pe lagata

itne mein numayan hua ek paikar-e-nuri

qadmon mein shafaq jis ke paDi bahr-e-huzuri

sanche mein Dhale jaise ki andam the sare

lapke wo qadam chumne bahte hue dhaare

bojhal thi palak nind ke be-saKHta-pan se

chhuTti thi kiran jaise ki har mu-e-badan se

thaali jo uThae thi to dil walon ko mahmez

mahjub hua dekh ke KHurshid-e-sahar-KHez

sari ki sanbhaale hue chuTki se thi chunan

baDhti thi use dekh ke har qalb ki dhaDkan

dariya mein dhare panw baDe naz-o-ada se

pariyan si lapakne lagin pani ki rida se

ruk ruk ke jo do-chaar qadam aur baDhae

chunan ko sanbhaale hue thaali ko uThae

nazrana diya phul ka amwaj ko us ne

thaali ko liya KHadima-e-KHas ne baDh ke

phir aab-e-muqaddas mein jo Dubki si lagai

badli si zara der ko mahtab pe chhai

pani se pari par ko jhaTakti hui nikli

andam-e-gul-andam se lipTi hui sari

moti se baraste the har ek mu-e-siyah se

shabnam ke wo qatre the kanwal par jo paDe the

wo mast-e-KHiram aai usi taur gai bhi

par barq-e-tapan KHirman-e-hasti par giri bhi