aspatal ka kamra

tamām shab kī dukhan, be-kalī, subuk ḳhvābī

numūd-e-sub.h ko darmāñ samajh ke kaaTī hai

ragoñ meñ dauḌte phirte lahū kī har aahaT

ajal-girafta ḳhayāloñ ko aas detī hai

magar vo aañkh jo sab dekhtī hai

hañstī hai

ufuq se sub.h kī pahlī kiran ubhartī hai

tamām raat kī fariyād ik sukūt meñ chup

tamām shab kī dukhan, be-kalī, subuk-ḳhvābī

harīrī pardoñ kī ḳhāmosh silvaToñ meñ gum

jo aañkh zinda thī

ḳhāmosh chhat ko taktī hai

aur ek aañkh jo sab dekhtī hai

hañsī

numūd-e-sub.h kī zartār raushnī ke saath

mahakte phuul darīche se jhāñk kar dekheñ

tū mez dar pe kisī dard kā nishāñ na mile

ugāldān davāoñ kī shīshiyāñ pañkhā

kuñvārī maañ kā tabassum, salīb āvezāñ

har ek chiiz ba-dastūr apnī apnī jagah

na.e marīz kī aamad kā intizār kare

aur ek aañkh jo sab dekhtī hai

hañstī rahe.

tamam shab ki dukhan, be-kali, subuk KHwabi

numud-e-subh ko darman samajh ke kaTi hai

ragon mein dauDte phirte lahu ki har aahaT

ajal-girafta KHayalon ko aas deti hai

magar wo aankh jo sab dekhti hai

hansti hai

ufuq se subh ki pahli kiran ubharti hai

tamam raat ki fariyaad ek sukut mein chup

tamam shab ki dukhan, be-kali, subuk-KHwabi

hariri pardon ki KHamosh silwaTon mein gum

jo aankh zinda thi

KHamosh chhat ko takti hai

aur ek aankh jo sab dekhti hai

hansi

numud-e-subh ki zartar raushni ke sath

mahakte phul dariche se jhank kar dekhen

tu mez dar pe kisi dard ka nishan na mile

ugaldan dawaon ki shishiyan pankha

kunwari man ka tabassum, salib aawezan

har ek chiz ba-dastur apni apni jagah

nae mariz ki aamad ka intizar kare

aur ek aankh jo sab dekhti hai

hansti rahe