aulad

bahār aa.egī phūTegī shāḳh se koñpal

shikast-e-barg-e-ḳhizāñ se yaqīn hotā hai

jo tum ho saath to mahsūs ho rahā hai mujhe

ḳhizāñ-nasīb chaman bhī hasīn hotā hai

hatheliyoñ se hinā tak abhī na chhūTī thī

gale ke phuul bhī baasī na hone paa.e the

ki vo hasīn-o-javāñ-sāl ḳhvāb TuuT ga.e

suhāg-rāt jo afshāñ meñ jagmagā.e the

zamāna kokh-jalī kah rahā hai kahne do

tumhāre haath meñ qismat kā faisla to nahīñ

tumhārā kaam hai phūloñ kī aarzū karnā

tumhāre bas meñ bahāroñ kā qāfila to nahīñ

nafas-nafas pe ye ehsās-e-tīrgī kaisā

palak palak meñ sitāre piro rahī ho kyoñ

tumheñ tamām chaman maiñ ne sauñp rakkhā hai

tum ik kalī ke liye jaan kho rahī ho kyoñ

ġharīb qaum ke ye honhār shahzāde

tum apne pyaar kī ra.anā.iyāñ inheñ de do

tum apne dil kī mohabbat bikher do in par

tum apnī ruuh kī tanhā.iyāñ inheñ de do

kahīñ khile hoñ magar kitne pyāre pyāre haiñ

ye phuul apne nahīñ haiñ magar hamāre haiñ

bahaar aaegi phuTegi shaKH se konpal

shikast-e-barg-e-KHizan se yaqin hota hai

jo tum ho sath to mahsus ho raha hai mujhe

KHizan-nasib chaman bhi hasin hota hai

hatheliyon se hina tak abhi na chhuTi thi

gale ke phul bhi basi na hone pae the

ki wo hasin-o-jawan-sal KHwab TuT gae

suhag-raat jo afshan mein jagmagae the

zamana kokh-jali kah raha hai kahne do

tumhaare hath mein qismat ka faisla to nahin

tumhaara kaam hai phulon ki aarzu karna

tumhaare bas mein bahaaron ka qafila to nahin

nafas-nafas pe ye ehsas-e-tirgi kaisa

palak palak mein sitare piro rahi ho kyon

tumhein tamam chaman main ne saunp rakkha hai

tum ek kali ke liye jaan kho rahi ho kyon

gharib qaum ke ye honhaar shahzade

tum apne pyar ki ranaiyan inhen de do

tum apne dil ki mohabbat bikher do in par

tum apni ruh ki tanhaiyan inhen de do

kahin khile hon magar kitne pyare pyare hain

ye phul apne nahin hain magar hamare hain